آپ ایک لیٹر پیٹرول پر کتنا ٹیکس دیتے ہیں؟ ہوشربا انکشاف

ایک لیٹر پیٹرول اور ڈیزل کی قیمت میں شامل ٹیکسز اور دیگر اخراجات کی تفصیلات سامنے آ گئی ہیں۔ وزارت توانائی کی دستاویزات کے مطابق پیٹرول کی فی لیٹر قیمت کا قریباً 46 فیصد حصہ ٹیکسز اور مختلف مارجنز پر مشتمل ہے، جس کے تحت شہری 211 روپے 26 پیسے ٹیکس کی مد میں ادا کرتے ہیں، جبکہ پیٹرول کی ایکس ریفائنری قیمت 247 روپے 15 پیسے ہے۔

مزید پڑھیں:پنجاب میں ریلیف اقدامات: پبلک ٹرانسپورٹ مفت، کسانوں اور شہریوں کے لیے پیٹرول پر سبسڈی کا اعلان

دستاویزات کے مطابق پیٹرول کی قیمت میں 24 روپے 12 پیسے کسٹم ڈیوٹی، 7 روپے 52 پیسے ان لینڈ فریٹ مارجن، 7 روپے 87 پیسے آئل مارکیٹنگ کمپنیوں کا منافع اور 8 روپے 64 پیسے پمپ ڈیلرز کا کمیشن شامل ہے۔ اس کے علاوہ 160 روپے 61 پیسے پیٹرولیم لیوی اور 2 روپے 50 پیسے کلائمیٹ سپورٹ لیوی بھی عائد کی گئی ہے۔

دوسری جانب، ڈیزل کی قیمت میں تقریباً 11.36 فیصد ٹیکس اور منافع شامل ہیں، جس کے تحت فی لیٹر ڈیزل پر 59 روپے 12 پیسے کے ٹیکسز اور مارجنز وصول کیے جاتے ہیں۔ ڈیزل کی ایکس ریفائنری قیمت 461 روپے 23 پیسے فی لیٹر ہے۔

مزید پڑھیں:پیٹرول کی قیمتوں میں اضافے کا دفاع نہیں کیا، ویڈیو پرانی ہے، شاہد آفریدی کی وضاحت

مزید تفصیلات کے مطابق ڈیزل پر 35 روپے 74 پیسے کسٹم ڈیوٹی، 4 روپے 37 پیسے ان لینڈ فریٹ مارجن، 7 روپے 87 پیسے آئل مارکیٹنگ کمپنیوں کا منافع اور 8 روپے 64 پیسے پمپ ڈیلرز کا کمیشن شامل ہے، جبکہ 2 روپے 50 پیسے کلائمیٹ سپورٹ لیوی عائد ہے۔ تاہم، ڈیزل پر پیٹرولیم لیوی صفر رکھی گئی ہے۔