کراچی میں غیر قانونی تارکین وطن اور نادرا افسران کے خلاف کریک ڈاؤن کے دوران متعدد گرفتاریاں عمل میں لائی گئی ہیں۔
ایف آئی اے کراچی نے بڑی کارروائی کرتے ہوئے میٹروول سائٹ ایریا اورنگی کراچی میں چھاپہ مارا، جہاں سے 2 افغان شہری حبیب اللہ اور نعمت اللہ کو گرفتار کیا گیا۔ ملزمان کے قبضے سے غیر قانونی پاکستانی شناختی دستاویزات برآمد ہوئیں۔
ابتدائی تفتیش کے دوران نادرا افسر کے ملوث ہونے کا انکشاف ہوا، جس کے مطابق نادرا اسسٹنٹ سپرنٹنڈنٹ فرقان احمد خان درانی نے شناختی کارڈ کی منظوری دی تھی۔
بعد ازاں ایف آئی اے نے نرسری کے علاقے میں دوسرا چھاپہ مار کر ملزم نادرا افسر فرقان احمد خان درانی کو بھی گرفتار کر لیا۔
ترجمان ایف آئی اے کے مطابق مقدمہ نمبر 122/2026 درج کر لیا گیا ہے۔
ملزمان کے خلاف فارنرز ایکٹ 1946 اور پی سی اے 1947 کے تحت کارروائی کی گئی ہے جبکہ گرفتار ملزمان کا 3 روزہ جسمانی ریمانڈ بھی حاصل کر لیا گیا ہے۔
ایف آئی اے کے مطابق مزید تفتیش جاری ہے اور دیگر ملوث افراد کی گرفتاری کے لیے کارروائیاں جاری ہیں۔
