نائب وزیراعظم و وزیر خارجہ سینیٹر اسحاق ڈار کی زیر صدارت فیول سبسڈی اسکیم سے متعلق نیشنل اسٹیئرنگ کمیٹی کا اجلاس منعقد ہوا۔
اجلاس میں اسحاق ڈار نے ہدایت کی کہ عوام کو ریلیف کی فراہمی، خصوصاً موٹرسائیکلوں، پبلک ٹرانسپورٹ اور زرعی شعبے کے لیے سبسڈی کے اقدامات جلد از جلد فعال کیے جائیں۔
مزید پڑھیں: کفایت شعاری اقدامات پر وزیراعظم کی زیرصدارت اجلاس، مارکیٹیں رات 8 بجے بند کرنے کا فیصلہ
اجلاس کو بریفنگ میں بتایا گیا کہ اسٹیٹ بینک آف پاکستان اور صوبائی حکام کے تعاون سے پبلک سروس ٹرانسپورٹ گاڑیوں کے لیے رقوم کی تقسیم کا آغاز کردیا گیا ہے۔
صوبائی نمائندوں نے اجلاس کو آگاہ کیا کہ موٹرسائیکل سبسڈی رجسٹریشن کے لیے موبائل ایپلیکیشن کا آغاز کر دیا گیا ہے اور ادائیگیوں کا آغاز آج سے متوقع ہے۔
نائب وزیراعظم نے کہاکہ سبسڈی کا نظام سادہ، قابلِ رسائی، شفاف اور وسیع پیمانے پر تشہیر کے ساتھ ہونا چاہیے تاکہ زیادہ سے زیادہ مستحق افراد اس سے فائدہ اٹھا سکیں۔
اجلاس میں وزیر آئی ٹی و ٹیلی کام، وزیراعظم کے معاون خصوصی طارق باجوہ، سیکریٹری آئی ٹی و ٹیلی کام، سیکریٹری پیٹرولیم، تمام صوبوں کے چیف سیکریٹریز اور متعلقہ محکموں کے سینیئر حکام نے شرکت کی۔
ڈیجیٹل معیشت کو مستحکم بنانے کے لیے آئی ٹی اقدامات پر پیشرفت کا جائزہ
دریں اثنا اسحاق ڈار کی زیر صدارت اہم اجلاس منعقد ہوا، جس میں ملک کی ڈیجیٹل معیشت کو مستحکم بنانے کے لیے آئی ٹی اقدامات پر پیشرفت کا جائزہ لیا گیا۔
اجلاس میں اسحاق ڈار کو ٹیکنالوجی انفراسٹرکچر کی بہتری، جدت کو فروغ دینے اور ڈیجیٹل گورننس کو مؤثر بنانے کے حوالے سے جاری اقدامات پر بریفنگ دی گئی۔
مزید پڑھیں: تیل کی بڑھتی ہوئی قیمتیں مجبوراً عوام پر منتقل کرنا پڑیں، وزیر پیٹرولیم علی پرویز ملک
بریفنگ میں بتایا گیا کہ ان اقدامات کا مقصد عوام کو بہتر اور تیز تر سرکاری خدمات کی فراہمی کو یقینی بنانا ہے۔
اجلاس میں وزیراعظم کے معاون خصوصی طارق باجوہ، وزارت آئی ٹی، وزارت تجارت اور وزارت خزانہ کے سیکریٹریز نے شرکت کی۔
