پاکستانی اداکار اور ماڈل عمر شہزاد نے مکہ مکرمہ سے اپنی اہلیہ شانزے لودھی کے ہمراہ شیئر کی گئی ویڈیو پر ہونے والی تنقید کے حوالے سے وضاحتی بیان جاری کر دیا ہے جس میں انہوں نے کہا ہے کہ ان کے اقدام کو غلط انداز میں پیش کیا جا رہا ہے۔
سوشل میڈیا پر جاری اپنے بیان میں عمر شہزاد کا کہنا تھا کہ مذکورہ ویڈیو ان کے عمرہ سفر کی ذاتی یادوں پر مبنی تھی اور اس کا مقصد کسی قسم کا تنازع پیدا کرنا نہیں تھا۔
View this post on Instagram
انہوں نے لکھا کہ ویڈیو مکہ مکرمہ میں گزارے گئے وقت کی یادوں کا ایک مجموعہ ہے، جس میں صرف عمرہ ہی نہیں بلکہ وہ تمام لمحات شامل ہیں جو ہم نے وہاں ساتھ گزارے۔
اداکار نے اپنے رشتے کی نوعیت پر بھی زور دیتے ہوئے کہا کہ ہم میاں بیوی ہیں اور جو کچھ ہم نے شیئر کیا اس میں کچھ بھی نامناسب یا غلط نہیں تھا۔ اداکار کا کہنا تھا کہ ان کے بارے میں لگائے جانے والے بعض اندازے غیر ضروری اور ناانصافی پر مبنی ہیں۔
انہوں نے کہا کہ ہم نے کچھ پیجز کو بھی تنقید کرتے دیکھا ہے۔ جو قیاس آرائیاں کی جا رہی ہیں وہ غیر ضروری اور ناانصافی ہے اور ہم اس بیانیے سے اختلاف کرتے ہیں۔
یہ بھی پڑھیں: ’یہ مقدس جگہ ہے پیرس کی سڑکیں نہیں‘، عمر شہزاد اور شائستہ لودھی کی عمرے کے دوران ویڈیو پر مداح برہم
عمر شہزاد نے لوگوں سے کہا کہ وہ دوسروں پر تنقید کرنے کے بجائے اپنے معاملات پر توجہ دیں۔ انہوں نے لکھا کہ اگر لوگ دوسروں پر فیصلہ سنانے میں کم وقت صرف کریں اور اپنی زندگیوں پر زیادہ توجہ دیں، تو شاید ان کے پاس یہاں آ کر غیر ضروری تنقید میں وقت ضائع کرنے کا موقع نہ ہو۔
انہوں نے مزید کہا کہ جو لوگ ان کے ارادوں کو نہیں سمجھتے انہیں ان کے کردار پر سوال اٹھانے سے گریز کرنا چاہیے۔ اس وضاحت پر بھی صارفین بھڑک اٹھے اور انہوں نے کہا کہ اگر یہ یادیں تھیں تو انہیں اپنے پاس محفوظ رکھنا چاہیے تھا نا کہ سوشل میڈیا پر پوسٹ کرنا چاہیے جبکہ دیگر نے کہا کہ مقدس جگہ کا احترام ضروری ہے چاہے آپ میاں بیوی ہی کیوں نہ ہوں۔
واضح رہے کہ گزشتہ دنوں پاکستانی شوبز انڈسٹری کے معروف اداکار و ماڈل عمر شہزاد اور ان کی اہلیہ شانزے لودھی کی طواف کے دوران ہاتھ پکڑنے اور قربت کے مظاہرے کی ایک ویڈیو سوشل میڈیا پر وائرل ہوئی تھی جس نے سوشل میڈیا پر ہنگامہ کھڑا کر دیا۔
View this post on Instagram
مداحوں نے جوڑے کے اس رویے کو مقدس مقام کے تقدس کے خلاف قرار دیتے ہوئے سخت تنقید کی ہے۔ایک صارف نے لکھا کہ ’یہ عمرہ ہے یا ہنی مون؟ ہمیں سمجھ نہیں آ رہی‘۔ ایک اور نے کہا، ’یہ مقدس جگہ ہے، پیرس کی سڑکیں نہیں جہاں رومانس کیا جائے۔‘
