وزیر دفاع خواجہ محمد آصف نے کہا ہے کہ پنجاب کی وزیر اعلیٰ مریم نواز شریف کو سرکاری طیارے کے معاملے پر بلاجواز تنقید کا نشانہ بنایا جا رہا ہے، جبکہ دیگر صوبوں کے وزرائے اعلیٰ بھی اس سہولت سے مستفید ہوتے ہیں۔
خواجہ محمد آصف نے سینیٹ اجلاس میں اظہار خیال کرتے ہوئے کہا کہ چاروں صوبوں کے وزرائے اعلیٰ کے پاس سرکاری جہاز موجود ہیں اور ہیلی کاپٹرز بھی ہیں، تاہم صرف پنجاب کی وزیر اعلیٰ کو تنقید کا نشانہ بنایا جا رہا ہے۔ میری دانست میں یہ سیاسی بددیانتی اور بدنیتی ہے۔ انہوں نے پاکستان تحریک انصاف کے ارکان کو مخاطب کرتے ہوئے کہا کہ ماضی میں بنی گالہ سے ہیلی کاپٹر کے استعمال کو بھی مدنظر رکھا جائے۔
انہوں نے مزید وضاحت کی کہ وزیر اعظم نے کوئی نیا جہاز نہیں خریدا، بلکہ پہلے سے موجود طیارے کو مرمت اور جدید سہولیات سے آراستہ کیا گیا ہے۔
وزیر دفاع کا کہنا تھا کہ پارلیمان ایک سنجیدہ فورم ہے جہاں ذمہ دار افراد موجود ہیں، اس لیے سیاسی پوائنٹ اسکورنگ یا غیر سنجیدہ طرزِ گفتگو سے گریز کیا جانا چاہیے۔
انہوں نے زور دیا کہ عوامی نمائندوں کو ذمہ داری کا مظاہرہ کرتے ہوئے ایسے معاملات پر محتاط اور متوازن مؤقف اختیار کرنا چاہیے۔
