پاکستان سمیت دُنیا بھر میں آج 5 جون کو ماحولیات کا عالمی دن پلاسٹک کی آلودگی کے خاتمے کے خصوصی نظریے کے طور پر منایا جا رہا ہے۔ پاکستان سمیت عالمی یوم ماحولیات کا یہ خصوصی دن 150 سے زیادہ ممالک میں منایا جا رہاہے، جب کہ اس کے علاوہ دیگر لاکھوں لوگ ذاتی حیثیت سے ’پلاسٹک سے پھیلنے والی آلودگی ‘ سے بچاؤ کے لیے سرگرمیوں میں حصہ لیں گے۔
عالمی یوم ماحولیات کی مناسبت سے پاکستان کے وزیراعظم میاں شہباز شریف نے اپنے پیغام میں دُنیا کے تمام ممالک پر زور دیا ہے کہ وہ پلاسٹک سے پھیلنے والی آلودگی کے خاتمے کے لیے اپنے عزم کا آعادہ کریں۔
شہباز شریف کا پہلا قدم، وزیراعظم ہاؤس میں پلاسٹک کے استعمال پر پاپندی کی ہدایت
وزیراعظم پاکستان نے اپنی جانب سے پہلا قدم اٹھاتے ہوئے ’وزیر اعظم ہاؤس‘ میں پلاسٹک کا استعمال بند کرنے کی ہدایت کر دی ہے۔
یوم ماحولیات کے حوالے سے اپنے پیغام میں وزیر اعظم پاکستان نے پلاسٹک کے استعمال سے پیدا ہونے والی آلودگی سے فوری نمٹنے کی ضرورت پر زور دیا اور کہا کہ پاکستان پلاسٹک کے استعمال سے باہر نکلنے کے لیے اپنے عزم کا آعادہ کرتا ہےاور اس حوالے سے ہمارا عزم غیر متزلزل ہے۔
وزیر اعظم شہباز کا مزید کہنا ہے کہ ان کی حکومت نے ملک میں وسائل کے درست اور پائیدار استعمال کی راہ پر گامزن کرنے کے لیے متعدد اقدامات کیے ہیں۔ حکومت نے متبادل کے طور پر ماحول دوست ذرائع اپنانے کو ترجیح دی ہے ۔ ان کا کہنا تھا کہ وفاقی دارلحکومت اسلام آباد میں پلاسٹک کے استعمال کے حوالے سے بنائے گئے قوانین 2023 پر فعال طریقے سے کام ہو رہا ہے
وزیراعظم نے کہا کہ پلاسٹک کے استعمال کی روک تھام کے حوالے سے بنائے گئے ضابطے اور ٹائم لائن پر مرحلہ وار عمل درآمد کیا جائے گا۔ اس حوالے سے اسلام آباد میں پہلے مرحلے میں پلاسٹک کے ایک بار استعمال کی اجازت ہو گی جب کہ دوسرے مرحلے میں پلاسٹک کے ایک بارکے استعمال کو بھی کم کردیا جائے گا ۔
یہ ضابطہ پلاسٹک کے ایک بار کے استعمال کو مرحلہ وار ختم کرنے کے لیے ایک جامع فریم ورک اور ٹائم لائن فراہم کرے گا۔ جب کہ پورے دارلحکومت میں پلاسٹک کے ایک بار استعمال کو بھی کم کرنے اور اس پر پابندی لگانے کے منصوبے پر بھی عمل درآمد کیا جائے گا۔
وزیر اعظم شہباز نے تصدیق کی ہے کہ پاکستان نے 2024 کے لیے مقرر کردہ اہداف کے مطابق پلاسٹک کی آلودگی کے خاتمے کے لیے ایک جامع حکمت عملی بنائی ہے اور اس کے لیے پاکستان عالمی سطح پر فعال کردار ادا کرے گا۔
وزیر اعظم نے شہریوں، کاروباری اداروں، سول سوسائٹی کی تنظیموں اور میڈیا سمیت تمام اسٹیک ہولڈرز پر زور دیا کہ وہ پلاسٹک کی آلودگی کے خلاف جنگ اور آنے والی نسلوں کے لیے کرہ ارض پر زندگی کی بقا کے لیے اپنے عزم کی تجدید کریں۔
