وزیراعلیٰ پنجاب مریم نواز شریف نے سوشل میڈیا پر بچوں اور خواتین کی ہراسمنٹ اور بلیک میلنگ کے خاتمے کے لیے بڑا فیصلہ کرتے ہوئے پنجاب سائبر کرائم یونٹ کے قیام کی منظوری دے دی ہے۔
اس اقدام کے تحت بلیک میلنگ اور ہراسمنٹ کا شکار بچوں اور بچیوں کو شکایت درج کرانے کے لیے کسی تھانے یا دفتر جانے کی ضرورت نہیں ہوگی بلکہ موبائل یونٹ ان تک خود پہنچے گا۔
مزید پڑھیں: پنجاب میں اینٹی ڈرون یونٹ قائم کرنے کا فیصلہ، مریم نواز نے منظوری دیدی
حکام کے مطابق سوشل میڈیا ہراسمنٹ کا شکار افراد، بالخصوص خواتین، ورچوئل پولیس اسٹیشن کے ذریعے بھی شکایت درج کرا سکیں گی جبکہ متاثرہ بچوں اور خواتین کی شناخت مکمل طور پر خفیہ رکھی جائے گی۔
مزید برآں، سائبر کرائم یونٹ کے فرنٹ ڈیسک اور ’پی کے ایم‘ ایپ کے ذریعے بھی شکایات درج کرنے کی سہولت فراہم کی جائے گی۔ حکومت نے ایسے جرائم میں ملوث افراد کو سخت سزا دینے کیلئے نئی قانون سازی کا فیصلہ بھی کیا ہے، جس کے تحت ’پنجاب آن لائن سیفٹی ایکٹ 2026‘ کا مسودہ تیار کیا جا رہا ہے۔
وزیراعلیٰ پنجاب مریم نواز شریف کا بڑا اقدام
سوشل میڈیا پر بچوں اور خواتین کی ہراسمنٹ و بلیک میلنگ کے خاتمے کیلئے پنجاب سائبرکرائم یونٹ کے قیام کی منظوری۔ متاثرہ خواتین اور بچیوں کو شکایت کیلئے کسی تھانے یا دفتر میں نہیں جانا پڑے گا@AmirSaeedAbbasi @MaryamNSharif pic.twitter.com/uaB9wkxuFM— Media Talk (@mediatalk922) April 10, 2026
ا
وزیراعلیٰ کی زیر صدارت اجلاس میں یہ بھی طے پایا کہ پنجاب پولیس میں سائبر پیٹرول ونگ اور سائبر پولیس اکیڈمی قائم کی جائے گی، جبکہ سوشل میڈیا کی نگرانی کے لیے جدید انٹیلی جنس سسٹم بھی متعارف کرایا جائے گا۔
مزید پڑھیں: سائبر کرائم کے خلاف کارروائی اب ایف آئی اے نہیں بلکہ الگ ادارہ کرے گا، وزیر آئی ٹی عمر سیف
مریم نواز شریف کا کہنا تھا کہ سائبر کرائم ایک بڑا چیلنج بن چکا ہے اور نئی نسل کا تحفظ حکومت کی اولین ترجیح ہے۔ انہوں نے ہدایت کی کہ بچیوں کو بلیک میلنگ سے بچانے کے لیے جدید ٹیکنالوجی کا بھرپور استعمال کیا جائے اور والدین بچوں کے سوشل میڈیا استعمال پر نظر رکھیں۔
انہوں نے واضح کیا کہ کسی کو بھی دوسروں کی پرائیویسی میں مداخلت کا حق نہیں اور سوشل میڈیا جرائم میں ملوث افراد کو انجام تک پہنچا کر مثال قائم کی جائے گی۔
