’دل کرتا ہے اپنا امریکی پاسپورٹ پھاڑ کر پاکستان میں ہی رہ جاؤں‘، سکھ یاتری کا پاکستانیوں سے محبت کا اعتراف

واہگہ بارڈر کے راستے 327ویں عالمی وساکھی میلے کے موقع پر بھارت سے 2840 سکھ یاتری پاکستان پہنچے جہاں ان کا شاندار اور پرتپاک استقبال کیا گیا۔ یاتریوں کی آمد پر سیکیورٹی کے سخت مگر فول پروف انتظامات کیے گئے تھے۔

اس موقع پر یاتریوں کے لیے لنگر، ٹرانسپورٹ، طبی سہولیات اور سیکیورٹی کے خصوصی انتظامات کیے گئے جبکہ ان کی حفاظت کے لیے پنجاب پولیس اور رینجرز کے خصوصی دستے بھی تعینات کیے گئے۔

بھارت اور دیگر ممالک سے آنے والے سکھ یاتریوں نے پاکستان آمد پر خوشی اور اطمینان کا اظہار کرتے ہوئے کہا کہ انہیں یہاں بہت عزت و احترام ملا ہے اور ان کا دل خوش ہو گیا ہے جبکہ مقامی لوگوں نے بھی ان کو بہت پیار دیا ہے۔

امریکا سے آئے ایک سکھ یاتری کا کہنا تھا کہ میرا دل کرتا ہے کہ میں اپنا پاسپورٹ پھاڑ کے پھینک دوں اور پاکستان میں ہی رہوں مجھے پاکستانیوں سے اتنا پیار ہے، لوگوں کے چہروں پر ہر وقت مسکراہٹ ہوتی ہے۔

امریکا سے آئے سکھ یاتری کی پاکستان سے انوکھی محبت!🇵🇰
#NankanaSahib #indiansikh #america #passport #DiscoverPakistan pic.twitter.com/mWckKaXOVH

— Discover Pakistan TV (@DiscoverpakTv) April 12, 2026

ایک خاتون نے کہا کہ گھر میں ایک مہمان آجائے تو سنبھالا نہیں جاتا لیکن ہمارے ساتھ 2200 یاتریوں کو عزت دی گئی، نئے بستر،کھانے، چائے اور سیکیورٹی دی گئی۔ ان کا کہنا تھا کہ ہمارے گوردوارے میں بستر اچھے نہیں ملتے لیکن یہاں ہمیں نئے بستر ملے ہیں۔

گھر میں ایک مہمان آجائے تو سنبھالا نہیں جاتا،ہمارے ساتھ 2200 یاتری آئے سب کو عزت دی گئی،نئے بستر،کھانے اور سیکیورٹی دی گئی،پاکستان کا شکریہ ادا کرتے:خاتون سکھ یاتری pic.twitter.com/ZSsFEd4YKl

— Saif Awan (@saifullahawan40) April 12, 2026

بھارتی سکھ یاتری نے وزیراعلیٰ پنجاب مریم نواز کی تعریفوں کے پل باندھ دیے، ان کا کہنا تھا کہ ہم انہیں دیکھتے ہیں، ہمیں وہ اور ان کا کام بہت پسند ہے۔ پاکستان میں بہت شاندار انتظامات ہیں اور تمام ضرورتوں کا خیال رکھا گیا ہے کہ کہیں کوئی کمی نہ رہ جائے۔

ان کا کہنا تھا کہ ہمیں پاکستان دیکھنے کا بہت شوق تھا اور یہاں آ کر بہت اچھا لگا، یہاں کے لوگ بہت پیار سے ملتے ہیں اور ایسا لگ رہا ہے یہ ملک اور اس کے لوگ ہمارے ہی ہیں۔

🚨شکریہ مریم نواز شریف ۔۔
بھارتی سکھ یاتری پاکستان پہنچ کر بہت خوش ہیں اور وزیراعلیٰ پنجاب مریم نواز کی تعریفوں کے پُل باندھ دیئے ۔۔۔ pic.twitter.com/q2XYcz88aV

— Tahir Mughal Pmln (@Tahirmughalpml8) April 13, 2026

واضح رہے کہ10 روز تک پاکستان میں قیام کے دوران سکھ یاتری ننکانہ صاحب، حسن ابدال اور کرتارپور نارووال سمیت مختلف مقدس مقامات کا دورہ کریں گے۔  اور 19 اپریل کو واپس روانہ ہو جائیں گے۔