پی ایس ایل 11 کے 22ویں میچ میں پشاور زلمی نے ملتان سلطانز کو 24 رنز سے شکست دے کر اپنی ناقابلِ شکست مہم کو برقرار رکھا ہے۔
کراچی کے نیشنل بینک اسٹیڈیم میں کھیلے گئے اس میچ میں پشاور زلمی نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 196 رنز کا پہاڑ جیسا مجموعہ ترتیب دیا۔
پشاور زلمی کی جانب سے کشال مینڈس نے جارحانہ بیٹنگ کرتے ہوئے 40 گیندوں پر 68 رنز کی نمایاں اننگز کھیلی، جبکہ محمد حارث نے صرف 17 گیندوں پر 40 رنز بنا کر ٹیم کو برق رفتار آغاز فراہم کیا۔
یہ بھی پڑھیں: پی ایس ایل 11: ملتان سلطانز نے راولپنڈیز کو 7 وکٹوں سے شکست دیدی
کپتان بابر اعظم نے 18 اور فرحان یوسف نے 30 رنز کا حصہ ڈالا۔ ملتان سلطانز کی جانب سے پیٹر سڈل اور محمد اسماعیل نے دو دو کھلاڑیوں کو آؤٹ کیا۔
جواب میں 197 رنز کے ہدف کے تعاقب میں ملتان سلطانز کی ٹیم مقررہ اوورز میں 8 وکٹوں پر 172 رنز ہی بنا سکی۔ ملتان سلطانز کا آغاز مایوس کن رہا جب صاحبزادہ فرحان جلد آؤٹ ہو گئے۔
اسٹیو اسمتھ اور جوش فلپ نے 55 رنز کی شراکت قائم کر کے اننگز کو سنبھالنے کی کوشش کی لیکن سفیان مقیم نے ایک ہی اوور میں دونوں سیٹ بلے بازوں کو پویلین بھیج کر ملتان کی کمر توڑ دی۔
یہ بھی پڑھیں: پی ایس ایل 11، پشاور زلمی نے بغیر ففٹی سب سے بڑا ہدف عبور کر کے ریکارڈ قائم کردیا
شان مسعود 35 رنز بنا کر نمایاں رہے جبکہ ایشٹن ٹرنر نے 20 رنز بنائے۔ پشاور زلمی کی جانب سے سفیان مقیم نے بہترین باؤلنگ کا مظاہرہ کرتے ہوئے 30 رنز کے عوض 3 وکٹیں حاصل کیں، جبکہ افتخار احمد اور ناہید رانا نے دو دو شکار کیے۔
عامر جمال نے آخری اوور میں نپی تلی باؤلنگ کر کے زلمی کی فتح پر مہر ثبت کی۔ پشاور زلمی اس جیت کے ساتھ پوائنٹس ٹیبل پر اپنی برتری مزید مستحکم کر لی ہے جبکہ ملتان سلطانز کو ٹورنامنٹ میں دوسری شکست کا سامنا کرنا پڑا ہے۔
