پاکستان ایسوسی ایشن آف ایگزی بیشن انڈسٹری کے بانی چیئرمین محمد خورشید برلاس نے ٹریڈ ڈویلپمنٹ اتھارٹی آف پاکستان کے سیکرٹری شہریار تاج سے ملاقات کی، جس میں ڈھاکا، بنگلہ دیش میں ہونے والی چوتھی میڈ اِن پاکستان ایگزیبیشن اینڈ بزنس کانفرنس سے متعلق امور پر تبادلہ خیال کیا گیا۔
خورشید برلاس نے بتایا کہ یہ نمائش 22 سے 26 ستمبر 2026 کو انٹرنیشنل کنونشن سٹی بسوندھرا آئی سی سی بی ڈھاکا میں منعقد ہوگی، جس میں ٹیکسٹائل، فوڈ پراڈکٹس، برقی آلات، کچن کا سامان، صارفین کی مصنوعات، جوتے، گھریلو سامان، فرنیچر، جواہرات و زیورات، ماربل و شیشہ، کھیلوں کا سامان، خدمات، فیشن و فیبرکس، سیاحت و مہمان نوازی، مشینری، پینٹ و کیمیکل اور دیگر شعبوں کی کمپنیز حصہ لیں گی۔
یہ بھی پڑھیے: امریکا کا ڈھاکا میں مغلیہ دور کی تاریخی مسجد کی بحالی کے لیے 2 لاکھ 35 ہزار ڈالر گرانٹ کا اعلان
شہریار تاج نے پاکستان ایسوسی ایشن آف ایگزی بیشن انڈسٹری کی کاوشوں کو سراہتے ہوئے کہا کہ ایسی نمائشیں ملکی معیشت کے فروغ اور برآمدات میں اضافے کے لیے اہم کردار ادا کرتی ہیں۔ انہوں نے کہا کہ پاکستان اور بنگلہ دیش کے درمیان تجارتی تعلقات کو مزید مضبوط بنانے کی ضرورت ہے اور پاکستانی مصنوعات کی عالمی سطح پر تشہیر وقت کی اہم ضرورت ہے۔
انہوں نے کہا کہ بنگلہ دیش میں پاکستانی مصنوعات کی مانگ موجود ہے اور انہیں وہاں پسند کیا جاتا ہے۔ انہوں نے یقین دہانی کرائی کہ ڈھاکا میں ہونے والی چوتھی میڈ اِن پاکستان ایگزیبیشن کے لیے بھرپور تعاون فراہم کیا جائے گا۔
ملاقات کے اختتام پر خورشید برلاس نے سیکرٹری ٹڈاپ شہریار تاج کو ایونٹ کا باضابطہ دعوت نامہ بھی پیش کیا۔
