تفتان بارڈر پر ایف آئی اے نے جعلی پاسپورٹ کے ذریعے پاکستان میں داخل ہونے کی کوشش ناکام بناتے ہوئے ایک مسافر کو گرفتار کر لیا اور مزید تحقیقات شروع کر دی ہیں۔
بلوچستان کے تفتان بارڈر پر فیڈرل انویسٹی گیشن ایجنسی(ایف آئی اے) نے بروقت کارروائی کرتے ہوئے ایک مسافر کی جعلی پاسپورٹ کے ذریعے پاکستان میں داخلے کی کوشش ناکام بنا دی۔
یہ بھی پڑھیے ایف آئی اے کی کارروائی، جعلی پاسپورٹ پر پاکستان آنے والا افغان شہری گرفتار
امیگریشن حکام کے مطابق ایران سے آنے والے ایک مسافر کو چیکنگ کے دوران مشکوک پایا گیا، جس کے پاس موجود پاسپورٹ کی جانچ پڑتال پر وہ جعلی ثابت ہوا۔ حکام نے فوری کارروائی کرتے ہوئے ملزم محمد رضا کو گرفتار کر لیا۔
ملزم کے خلاف مقدمہ درج کر کے اسے مزید تفتیش کے لیے اینٹی ہیومن ٹریفکنگ سرکل تفتان منتقل کر دیا گیا ہے، جہاں اس سے جعلی سفری دستاویزات کے نیٹ ورک کے حوالے سے تحقیقات جاری ہیں۔
یہ بھی پڑھیے جعلی دستاویزات پر سفر کرنے والے افراد کے گرد گھیرا مزید تنگ کردیا گیا
ایف آئی اے حکام کا کہنا ہے کہ بارڈر پر نگرانی کا نظام مزید مؤثر بنایا جا رہا ہے تاکہ انسانی اسمگلنگ اور جعلی دستاویزات کے ذریعے غیر قانونی داخلے کی ہر کوشش کو ناکام بنایا جا سکے۔
