افغانستان کے سابق فاسٹ بولر شاپور زدران شدید علالت کے باعث اسپتال میں زیر علاج ہیں جہاں انہیں انتہائی نگہداشت وارڈ میں منتقل کیا گیا ہے۔
میڈیا رپورٹس کے مطابق 38 سالہ سابق کرکٹر کی حالت تشویشناک بتائی جا رہی ہے اور ڈاکٹرز مسلسل نگرانی کر رہے ہیں۔ خاندانی ذرائع کے مطابق شاپور زدران کے سفید خون کے خلیات کی تعداد خطرناک حد تک کم ہو گئی ہے، جس کے باعث ان کی طبیعت نہایت نازک ہے۔
یہ بھی پڑھیے: ’نسیم شاہ کے 2 چھکے سب سے تکلیف دہ لمحہ تھا’، افغان کرکٹر رحمان اللہ گرباز کا بھارتی میڈیا کو انٹرویو
شاپور زدران کی اسپتال سے سامنے آنے والی تصاویر سوشل میڈیا پر وائرل ہو گئی ہیں، جس کے بعد کرکٹ شائقین اور سابق کھلاڑیوں نے ان کی صحتیابی کے لیے دعائیں شروع کر دی ہیں۔
شاہد آفریدی نے سوشل میڈیا پر پیغام جاری کرتے ہوئے کہا کہ انہوں نے شاپور زدران کے بھائی سے بات کی ہے اور ان کی حالت سن کر افسوس ہوا۔ انہوں نے زدران کے لیے جلد صحتیابی کی دعا بھی کی۔
اسی طرح عمر اکمل نے بھی شاپور زدران کو اپنا قریبی دوست قرار دیتے ہوئے ان کی جلد صحتیابی کے لیے نیک خواہشات کا اظہار کیا۔
یہ بھی پڑھیے: افغان کرکٹر راشد خان کے خاندان کے ہمراہ پشاور میں قیام پر خواجہ آصف کا شدید ردعمل
شاپور زدران افغانستان کے نمایاں کرکٹرز میں شمار ہوتے ہیں۔ انہوں نے 2009 میں بین الاقوامی کرکٹ میں ڈیبیو کیا اور مجموعی طور پر 80 میچز میں افغانستان کی نمائندگی کی۔ ایک روزہ میچز میں انہوں نے 44 وکٹیں حاصل کیں جبکہ ٹی ٹوئنٹی فارمیٹ میں ان کے نام 27 وکٹیں ہیں۔
بائیں ہاتھ سے تیز بولنگ اور جارحانہ انداز کے باعث شاپور زدران نے عالمی سطح پر افغانستان کرکٹ کو شناخت دلانے میں اہم کردار ادا کیا۔
