کراچی سے روانہ ہونے والی پاکستانی عازمینِ حج کی پہلی پرواز مدینہ منورہ پہنچ گئی، جس میں 155 عازمینِ حج شامل تھے۔ مدینہ پہنچنے پر عازمین کا پرتپاک اور باوقار استقبال کیا گیا۔
اس موقع پر ڈی جی حج جدہ عبدالوہاب سومرو، ڈائریکٹر مدینہ زاہد سہیل، کوآرڈینیٹر مدینہ کاشف حسین اور ڈائریکٹر مکہ محمد عارف اسلم راؤ نے عازمین کا خیرمقدم کیا۔
استقبال کے دوران پھول نچھاور کیے گئے اور تحائف پیش کیے گئے، جبکہ سعودی روایات کے مطابق دف کی تھاپ اور خوش آمدیدی نغموں نے ماحول کو روحانی رنگ دے دیا۔
عازمین کو مرکزیہ کے علاقے میں معیاری رہائش فراہم کی گئی اور فوری طور پر نسک کارڈز جاری کیے گئے تاکہ عبادات اور نقل و حرکت میں آسانی رہے۔
ان کی تواضع کھجور، مشروبات اور معیاری ناشتے سے کی گئی۔ عازمین نے انتظامات پر اطمینان کا اظہار کرتے ہوئے وزارت مذہبی امور اور حج مشن پاکستان کی کوششوں کو سراہا۔
حکام کے مطابق آئندہ پروازوں کے لیے بھی اسی معیار کے انتظامات کیے گئے ہیں اور مختلف شعبوں کے درمیان قریبی رابطہ برقرار رکھا جا رہا ہے۔
لاہور سے روٹ ٹو مکہ کی پہلی پرواز
دوسری جانب لاہور سے روٹ ٹو مکہ منصوبے کے تحت پہلی حج پرواز 345 عازمینِ حج کو لے کر مدینہ منورہ روانہ ہوئی۔
عازمین کو وفاقی وزیر مذہبی امور سردار محمد یوسف، صوبائی وزیر صحت خواجہ سلمان رفیق، صوبائی وزیر خزانہ میاں مجتبیٰ شجاع الرحمن، سعودی سفیر نواف سعید المالکی، وفاقی سیکرٹری مذہبی امور ابرار احمد مرزا اور روٹ ٹو مکہ پراجیکٹ کے سربراہ میجر جنرل ڈاکٹر صالح بن سعد المیرابا نے الوداع کیا۔
اس موقع پر مقررین نے حرمین شریفین کے خادم، ولی عہد محمد بن سلمان، سعودی وزیر حج و عمرہ ڈاکٹر توفیق بن ربیعہ اور سعودی سفیر نواف بن سعید المالکی کی جانب سے فراہم کردہ سہولیات اور تعاون کو خراج تحسین پیش کیا۔
روٹ مکہ پراجیکٹ کی سرگرمیاں اور انتظامات
اس سے قبل روٹ مکہ پراجیکٹ کے سربراہ میجر جنرل ڈاکٹر صالح بن سعد المیرابا وفد کے ہمراہ لاہور پہنچے، جہاں ان کا استقبال ایڈیشنل سیکریٹری مذہبی امور ڈاکٹر ساجد محمود چوہان اور سعودی سفیر نواف بن سعید المالکی نے کیا۔
سعودی وفد میں وزارت خارجہ، وزارت داخلہ، سول ایوی ایشن، روٹ مکہ پراجیکٹ اور وزارت اطلاعات و میڈیا کے اعلیٰ افسران شامل تھے، جو پہلی روٹ مکہ حج پرواز کے تاریخی آغاز میں شریک ہوئے۔
حکام کے مطابق عازمینِ حج کی رہنمائی اور سہولت کے لیے وزارت مذہبی امور کا عملہ لاہور ایئرپورٹ پر 24 گھنٹے تعینات ہے تاکہ تمام امور کو مؤثر انداز میں انجام دیا جا سکے۔
