ایران کی پاسدارانِ انقلاب نے آبنائے ہرمز کے قریب بھارت کے 2 تیل بردار بحری جہازوں کو گزرنے سے روک دیا ہے، جس کے دوران فائرنگ کے واقعات کی بھی اطلاعات سامنے آئی ہیں۔
عرب میڈیا کے مطابق متاثرہ جہازوں میں ایک وی ایل سی سی سپر ٹینکر بھی شامل ہے۔ ان جہازوں پر مجموعی طور پر قریباً 20 لاکھ بیرل عراقی تیل موجود ہے۔
دوسری جانب برطانوی میری ٹائم ایجنسی نے بتایا ہے کہ عمان کے شمال مشرق میں قریباً 20 ناٹیکل میل کے فاصلے پر ایک واقعے کی اطلاع ملی ہے، جہاں پاسداران انقلاب کی گن بوٹس ٹینکر کے قریب آئیں۔
ایجنسی کے مطابق ان گن بوٹس کی جانب سے ٹینکر پر فائرنگ بھی کی گئی، تاہم جہاز اور اس کا عملہ محفوظ رہا۔
رپورٹس کے مطابق آبنائے ہرمز عبور کرنے کی کوشش کے دوران کم از کم 2 تجارتی جہازوں پر فائرنگ کے واقعات پیش آئے ہیں۔
شپنگ ذرائع کا کہنا ہے کہ فوری طور پر کسی ممکنہ نقصان کی مکمل تفصیلات واضح نہیں ہو سکیں۔
