سیاسی جماعت عوام پاکستان نے اسلام آباد میں کچی آبادیوں کے مکینوں کے گھروں کی جاری مسماری پر شدید تشویش اور سخت مذمت کا اظہار کرتے ہوئے اسے عدالتی احکامات اور شہریوں کے بنیادی حقوق کی کھلی خلاف ورزی قرار دیا ہے۔
عوام پاکستان کے قومی ترجمان ڈاکٹر ظفر مرزا کی جانب سے جاری بیان میں کہا گیا ہے کہ وفاقی آئینی عدالت کی جانب سے واضح حکمِ امتناعی (اسٹے آرڈر) کے باوجود بری امام، علامہ اقبال کالونی جی-7 اور دیگر علاقوں میں مسماری کی کارروائیاں جاری ہیں، جو عدالتی فیصلوں کی صریح خلاف ورزی ہیں۔
بیان میں کہا گیا ہے کہ عوام پاکستان وفاقی آئینی عدالت کے اس فیصلے کا خیرمقدم کرتی ہے جس میں جبری بے دخلی کے خلاف حکمِ امتناعی برقرار رکھا گیا اور کیپیٹل ڈیولپمنٹ اتھارٹی (سی ڈی اے) کو 4 ہفتوں میں کچی آبادیوں سے متعلق جامع اور قابلِ عمل پالیسی بنانے کی ہدایت دی گئی ہے۔
تاہم پارٹی کا کہنا ہے کہ اس تاخیر کے باعث لاکھوں شہری عدم تحفظ اور خوف کی فضا میں زندگی گزارنے پر مجبور ہیں، جو کسی بھی مہذب معاشرے میں قابلِ قبول نہیں۔
بیان کے مطابق عوام پاکستان کا مؤقف ہے کہ ریاست کی بنیادی ذمہ داری کمزور طبقات کا تحفظ ہے نہ کہ انہیں بے گھر کرنا۔ سی ڈی اے آرڈیننس 1960 کے تحت ریاست پر لازم ہے کہ غیر رسمی بستیوں کو ریگولرائز کیا جائے یا متاثرہ افراد کو متبادل رہائش فراہم کی جائے، لیکن یہ ذمہ داری مسلسل نظر انداز کی جا رہی ہے۔
پارٹی کے مطابق اسلام آباد میں اس وقت 4 لاکھ 50 ہزار سے زائد افراد یا تو بے گھر ہو چکے ہیں یا مسلسل بے دخلی کے خطرے سے دوچار ہیں، جسے محض انتظامی معاملہ نہیں بلکہ ایک سنگین انسانی اور آئینی بحران قرار دیا گیا ہے۔
عوام پاکستان نے آل پاکستان الائنس فار کچی آبادیز کے ساتھ یکجہتی کا اظہار کرتے ہوئے کہا ہے کہ وہ ان شہریوں کے ساتھ کھڑی ہے جو اپنے بنیادی حقوق، یعنی رہائش، تحفظ اور وقار کے لیے جدوجہد کر رہے ہیں۔
بیان میں مطالبہ کیا گیا ہے کہ مسماری کی کارروائیاں فوری طور پر روکی جائیں، عدالتی احکامات پر مکمل عملدرآمد کیا جائے، متاثرہ خاندانوں کو فوری تحفظ، متبادل رہائش اور منصفانہ معاوضہ دیا جائے، اور تمام فیصلے متاثرہ کمیونٹیز کی مشاورت سے کیے جائیں۔
آخر میں عوام پاکستان نے اس عزم کا اعادہ کیا ہے کہ وہ ہر فورم پر کچی آبادیوں کے مکینوں کی آواز بنتی رہے گی اور ان کے آئینی و انسانی حقوق کے تحفظ کے لیے اپنی جدوجہد جاری رکھے گی۔
