الیکشن کمیشن آف پاکستان نے خیبر پختونخوا سے سینیٹ کی خالی نشست پر ہونے والا ضمنی انتخاب اگلی سماعت تک مؤخر کر دیا ہے۔
چیف الیکشن کمشنر کی سربراہی میں 3رکنی کمیشن نے کیس کی سماعت کی، جس کے بعد فیصلہ کیا گیا کہ معاملے پر مزید غور کے لیے سماعت 7 مئی تک ملتوی کی جائے گی۔ کمیشن نے تمام امیدواروں اور متعلقہ فریقین کو نوٹس بھی جاری کر دیے ہیں۔
یہ بھی پڑھیے الیکشن کمیشن نے مراد سعید کو سینیٹ کی نشست کے لیے نااہل قرار دے دیا
درخواست گزار جلال خان اپنے وکیل کے ہمراہ کمیشن کے سامنے پیش ہوئے۔ ان کے وکیل نے مؤقف اختیار کیا کہ مراد سعید نے بطور سینیٹر حلف نہیں اٹھایا، اس لیے ان کی نشست کو خالی قرار دینا قانونی طور پر درست نہیں۔
وکیل کا کہنا تھا کہ جب کسی رکن نے حلف ہی نہیں لیا تو نشست خالی ہونے کا سوال ہی پیدا نہیں ہوتا، اس معاملے میں واضح قانونی اور آئینی ابہام موجود ہے۔ انہوں نے استدعا کی کہ اس صورتحال میں سینیٹ کی نشست پر ضمنی انتخاب ملتوی کیا جائے۔
یہ بھی پڑھیے مراد سعید کا سینیٹ سے مستعفی ہونے کا اعلان، پی ٹی آئی کو اجتماعی استعفوں کا مشورہ
الیکشن کمیشن نے دلائل سننے کے بعد سینیٹ کی اس نشست پر 23 اپریل کو شیڈول ضمنی انتخاب کو موخر کرتے ہوئے آئندہ سماعت 7 مئی مقرر کر دی ہے۔
