پاکستان سپر لیگ کے 32 ویں مقابلے میں پشاور زلمی نے کوشل مینڈس اور فرحان یوسف کی جارحانہ بلے بازی کی بدولت کراچی کنگز کو 7 وکٹوں سے مات دے کر میدان مار لیا ہے۔
یہ بھی پڑھیں: پی ایس ایل 11: پشاور زلمی نے کوئٹہ گلیڈی ایٹرز کو 118 رنز سے شکست دے دی
لاہور کے قذافی اسٹیڈیم میں کھیلے گئے اس سنسنی خیز میچ میں کراچی کنگز کا 183 رنز کا ہدف پشاور زلمی نے محض 3 وکٹوں کے نقصان پر 19 ویں اوور میں ہی حاصل کر لیا۔
میچ کا آغاز کراچی کنگز کی بیٹنگ سے ہوا جہاں جیسن رائے نے حریف بولرز کی لائن اور لینتھ بگاڑتے ہوئے 51 گیندوں پر 85 رنز کی شاندار اننگز کھیلی۔ ان کی اس باری میں 11 چوکے اور 2 چھکے شامل تھے، جبکہ اعظم خان نے بھی 35 رنز بنا کر ٹیم کو ایک مضبوط مجموعے تک پہنچانے میں اہم کردار ادا کیا۔
تاہم اننگز کا آخری اوور پشاور زلمی کے نوجوان فاسٹ بولر علی رضا کے نام رہا جنہوں نے پی ایس ایل کی تاریخ کی ایک یادگار ہیٹ ٹرک مکمل کی۔ علی رضا نے آخری اوور میں مسلسل 3 وکٹیں حاصل کر کے کراچی کنگز کو مقررہ اوورز میں 182 رنز تک محدود کر دیا، علی رضا نے مجموعی طور پر 4 اہم وکٹیں حاصل کیں۔
ہدف کے تعاقب میں پشاور زلمی کی ابتدائی وکٹیں جلد گرگئیں، جس میں کپتان بابر اعظم 25 رنز بنا کر آؤٹ ہوئے۔ ایک موقع پر ایسا محسوس ہورہا تھا کہ کراچی کنگز میچ پر گرفت مضبوط کررہی ہے، لیکن کوشل مینڈس اور فرحان یوسف نے میچ کا پانسا پلٹ دیا۔
یہ بھی پڑھیں: پی ایس ایل 2026، پشاور زلمی کی قلندرز پر دھاک، یکطرفہ مقابلے کے بعد 76 رنز سے شکست
کوشل مینڈس نے 43 گیندوں پر 80 رنز کی ناقابلِ شکست اننگز کھیل کر کراچی کے بولرز کو بے بس کر دیا، جبکہ فرحان یوسف نے بھی 58 رنز کی برق رفتار اننگز کھیل کر ٹیم کی فتح یقینی بنائی۔
دونوں بلے بازوں کے درمیان 119 رنز کی ناقابلِ شکست شراکت نے پشاور زلمی کو 7 گیندیں قبل ہی ہدف تک پہنچا دیا۔ پشاور زلمی کے علی رضا کو ان کی تباہ کن بولنگ اور ہیٹ ٹرک پر میچ کا بہترین کھلاڑی قرار دیا گیا۔
