پاکستان سپر لیگ (پی ایس ایل) کے ایک میچ میں حیدرآباد کنگزمین کے ہاتھوں شکست کے بعد ملتان سلطانز کے بیٹر صاحبزادہ فرحان نے کہا ہے کہ ٹیم اپنی خامیوں کو دور کرتے ہوئے آئندہ میچ میں اسلام آباد کے خلاف مضبوط واپسی کرے گی۔
بدھ کو کھیلے گئے مقابلے میں حیدرآباد کنگزمین نے ملتان سلطانز کو 4 وکٹوں سے شکست دی۔
ملتان کی ٹیم نے پہلے بیٹنگ کرتے ہوئے 20 اوورز میں 7 وکٹوں کے نقصان پر 213 رنز بنائے، جس میں اسٹیو اسمتھ کی 106 رنز کی شاندار اننگز اور صاحبزادہ فرحان کے 66 رنز نمایاں تھے۔
Sahibzada Farhan and Steve Smith put on a 132-run opening stand 🔥#HBLPSL11 | #NewEra | #HKvMS pic.twitter.com/bGlcmEYB73
— PakistanSuperLeague (@thePSLt20) April 22, 2026
ہدف کے تعاقب میں حیدرآباد کنگزمین نے عثمان خان کی سینچری کی بدولت 214 رنز کا ٹارگٹ آخری اوور میں حاصل کرلیا۔
میچ کے بعد پریس کانفرنس میں صاحبزادہ فرحان نے کہاکہ اسمتھ کی فارم کو دیکھتے ہوئے بڑے اسکور کی توقع تھی، تاہم مخالف ٹیم نے بھی بہترین کھیل پیش کیا اور اسے کریڈٹ دینا چاہیے۔
انہوں نے کہاکہ ٹی20 فارمیٹ میں کچھ بھی ممکن ہوتا ہے اور شکست کی ذمہ داری صرف بولرز پر ڈالنا درست نہیں۔
ان کا کہنا تھا کہ ٹیم اپنی غلطیوں سے سیکھتے ہوئے اگلے میچ میں بہتر کارکردگی دکھانے کی کوشش کرے گی۔ انہوں نے ذاتی کارکردگی کے حوالے سے کہا کہ انہوں نے اپنے اسٹرائیک ریٹ کو بہتر بنانے پر کام کیا اور مسلسل محنت سے بہتری ممکن ہے۔
صاحبزادہ فرحان نے مزید کہا کہ پاور ہٹنگ کو بہتر بنانے کے لیے وہ میچ جیسی صورتحال میں پریکٹس کر رہے ہیں اور اسٹیو اسمتھ کے ساتھ کھیلنا ایک خوشگوار تجربہ ہے۔
انہوں نے شائقین کی کم تعداد پر بھی بات کرتے ہوئے کہا کہ ابتدائی میچز میں کراؤڈ کی کمی محسوس ہوئی، تاہم اب اس کی عادت ہوگئی ہے، اگر زیادہ تماشائی موجود ہوتے تو ماحول مزید بہتر ہوتا۔
انہوں نے کہاکہ ایک کھلاڑی کے کیریئر میں اتار چڑھاؤ آتا رہتا ہے، گزشتہ سال پی ایس ایل ان کے لیے کم بیک کا ذریعہ بنی۔
انہوں نے بتایا کہ وہ پی ایس ایل کے بعد ریڈ بال کرکٹ میں حصہ لیں گے تاکہ ون ڈے اور طویل فارمیٹ کے لیے تیاری کر سکیں، اور ان کی خواہش ہے کہ پاکستان کے لیے ٹیسٹ کرکٹ بھی کھیلیں۔
