لاہور کے علاقے اچھرہ میں 3 کمسن بہن بھائیوں کے بہیمانہ قتل کا افسوسناک واقعہ پیش آیا ہے، جس نے علاقے میں خوف و ہراس پھیلا دیا ہے۔
پولیس کے مطابق جاں بحق ہونے والے بچوں کی شناخت 5 سالہ مومنہ بتول، 4 سالہ مومن رضا اور ڈیڑھ سالہ ام حبیبہ کے ناموں سے ہوئی ہے۔
ابتدائی تحقیقات کے مطابق بچوں کو نامعلوم وجوہات کی بنا پر تیز دھار آلے سے قتل کیا گیا ہے۔
یہ بھی پڑھیں: لاہور میں معروف ٹک ٹاکر کو شوہر نے قتل کردیا، وجہ کیا بنی؟
تہرے قتل کے اس وقوعے کے وقت بچوں کے والدین گھر کو تالا لگا کر دوائی لینے گئے ہوئے تھے جبکہ بچے گھر میں اکیلے موجود تھے۔
ڈی آئی جی انویسٹی گیشن سید ذیشان رضا نے جائے وقوعہ کا دورہ کیا اور شواہد اکٹھے کرنے کے عمل کا جائزہ لیا۔
ان کا کہنا تھا کہ فورینزک ٹیموں نے موقع سے اہم شواہد حاصل کر لیے ہیں جبکہ واقعے کی ہر پہلو سے تحقیقات کی جا رہی ہیں۔
مزید پڑھیں: لاہور، سابق ایکسائز آفیسر رانا آفتاب احمد قتل، پولیس نے 4 نامعلوم افراد کے خلاف مقدمہ درج کرلیا
پولیس نے ایس پی انویسٹی گیشن ماڈل ٹاؤن کی سربراہی میں خصوصی ٹیم تشکیل دے دی ہے، جو ملزمان کی گرفتاری کے لیے مختلف پہلوؤں پر کام کر رہی ہے۔
جاں بحق بچوں کی لاشوں کو پوسٹ مارٹم کے لیے مردہ خانے منتقل کر دیا گیا ہے۔
ڈی آئی جی انویسٹی گیشن کے مطابق جلد ملزمان کو گرفتار کر کے قانون کے کٹہرے میں لایا جائے گا۔
