بنگلہ دیش بارڈر گارڈ (بی جی بی) نے کومیلا سرحد کے قریب اسمگلنگ کے خلاف ایک بڑی کارروائی کرتے ہوئے 84 لاکھ 50 ہزار ٹکا سے زائد مالیت کی بھارتی ساڑیاں قبضے میں لے لی ہیں۔ حکام کے مطابق یہ کارروائی خفیہ اطلاع ملنے پر برہمن پاڑہ اپ ضلع کے سرحدی علاقے میں کی گئی۔
یہ بھی پڑھیں: بنگلہ دیش بارڈر گارڈ کی کارروائی، بھارت سے اسمگل شدہ کروڑوں مالیت کا سامان برآمد
سلطان پور بٹالین (60 بی جی بی) کے تحت شاشیدل بارڈر آؤٹ پوسٹ کے اہلکاروں نے رات گئے سرحد کے قریبی علاقے میں چھاپہ مارا جہاں سے بھاری مقدار میں اعلیٰ معیار کی بھارتی ساڑیاں برآمد ہوئیں، حکام کے مطابق برآمد شدہ سامان کی کل مالیت تقریباً 8,457,500 ٹکا لگائی گئی ہے۔
بٹالین کے کمانڈنگ آفیسر لیفٹیننٹ کرنل ایس ایم شریف الاسلام نے میڈیا کو بتایا کہ ضبط شدہ سامان کو قانونی ضابطے پورے کرنے کے بعد متعلقہ کسٹمز حکام کے حوالے کیا جارہا ہے۔
یہ بھی پڑھیں: بنگلہ دیشی فورسز کی بھارتی سرحد کے قریب کارروائی، انڈین ساختہ دھماکا خیز مواد برآمد
انہوں نے مزید کہا کہ سرحدی سیکیورٹی کو یقینی بنانے اور اسمگلنگ کی روک تھام کے لیے انٹیلی جنس نگرانی مزید سخت کر دی گئی ہے اور اس طرح کی کارروائیاں مستقبل میں بھی جاری رہیں گی۔
