ورلڈ ٹیسٹ چیمپئن شپ: دوسرے روز کے اختتام پر کینگروز بھارت پر حاوی

آسٹریلیا اور بھارت کے درمیان جاری آئی سی سی ٹیسٹ چیمپئن شپ کے فائنل میں دوسرے روز بھی کینگروز کی ٹیم بھارتی ٹیم پر حاوی رہی۔
دوسرے دن کھیل کے اختتام پر بھارت نے بیٹنگ کرتے ہوئے آسٹریلیا کے پہلی اننگز کے 469 رنز کے جواب میں 5 وکٹوں کے نقصان پر 151 رنز بنائے۔

اجینکیا رہانے 29 اور سریکار بھارت 5 رنز بناکرناٹ آؤٹ رہے، روہت شرما 15، شبمن گل 13، پجارا اور ویرات کوہلی 14،14 رنز بناکر آؤٹ ہوگئے صرف رویندرا جدیجا سب سے زیادہ 48 رنز کی اننگز کھیل سکے۔
آسٹریلیا کی جانب سے اسٹارک، کمنز، بولینڈ، کیمرون گرین اور نیتھن لائن نے ایک ایک وکٹ حاصل کی۔ بھارت کو 469 رنز کے تعاقب میں مزید 318 رنز بنانے ہوں گے۔

انگلینڈ کے اوول کرکٹ گراؤنڈ میں آج تیسرے دن کا کھیل جاری ہے۔

پہلے روز کا کھیل

ورلڈ ٹیسٹ چیمپئن شپ کے فائنل کے پہلے دن کے اختتام پر آسٹریلیا نے بھارت کے خلاف 3 وکٹوں کے نقصان پر 327 رنز بنا لیے، ٹریوس ہیڈ
کے شاندار 146 اور اسٹیو اسمتھ نے 95 رنز کی اننگز کھیلی۔

بھارت نے ٹاس جیت کر پہلے آسٹریلیا کو بیٹنگ کی دعوت دی، آسٹریلین اوپنر عثمان خواجہ محمد سراج کی گیند پر بغیر کوئی رنز بنائے آؤٹ ہوئے، ڈیوڈ وارنر، شر دُل ٹھاکرکی گیند پر 43 رنز بناکرآؤٹ ہوئے۔ لیبوشین 26 رنز بنا کر محمد شامی کی گیند پر آؤٹ ہوئے۔

ٹریوس ہیڈ نے 146 اور اسٹیو اسمتھ نے 95 رنز بنا رکھے ہیں، بھارت کی جانب سے محمد سراج، شر دُل ٹھاکر اور شامی نے ایک، ایک وکٹ حاصل کی ہے۔

اس سے قبل آئی سی سی ورلڈ ٹیسٹ چیمپئن شپ کا فائنل بھارت اور آسٹریلیا کے درمیان شروع ہوگیا، اوول کرکٹ گراؤنڈ میں جاری میچ میں بھارت نے آسٹریلیا کے خلاف ٹاس جیت کر پہلے بولنگ کا فیصلہ کیا تھا۔

لندن کے اوول کرکٹ گراؤنڈ میں آسٹریلیا اور بھارت کے درمیان انٹرنیشنل کرکٹ کونسل (آئی سی سی) ورلڈ ٹیسٹ چیمپئن شپ کا فائنل شروع ہوچکا ہے۔

آسٹریلین ٹیم کے پلیئنگ اسکوڈ میں ڈیوڈ وارنر، عثمان خواجہ، مارنس لیبوشین، سٹیون سمتھ، ٹراوس ہیڈ، کیمرون گرین، ایلکس کیری، مچل اسٹارک، کپتان پیٹ کمنز، نیتھن لیون، اسکاٹ بولین شامل ہیں۔

بھارت کے پلیئنگ الیون اسکواڈ میں کپتان روہت شرما، شبمان گل، شتیشور پوجارہ، ویرات کوہلی، اجنکیا راہنے، سریکار بھارت، رویندرا جدیجا، شردل ٹھاکر، امیش یادیو، محمد شامی اور محمد سراج شامل ہیں۔

آئی سی سی ورلڈ ٹیسٹ چیمپئن شپ کا فائنل آج 7 جون سے اوول کرکٹ گراؤنڈ میں شروع ہوگا، فائنل جیتنے والی ٹیم کو 16 لاکھ ڈالرز جبکہ دوسرے نمبر پر آنے والی ٹیم کو 8 لاکھ ڈالرز انعامی رقم ملے گی۔

آئی سی سی ٹیسٹ چیمپئن شپ کے فائنل میں آسٹریلیا اور بھارت کی ٹیمیں مدمقابل ہیں۔ بھارتی ٹیم دوسری مرتبہ ٹیسٹ چیمپئن شپ کا فائنل کھیل رہی ہے، 2021 میں پہلی مرتبہ ٹیسٹ چیمپئن شپ کے فائنل میں نیوزی لینڈ نے بھارت کو شکست دی تھی۔

ورلڈ ٹیسٹ چیمپئن شپ ٹرافی کی تقریب رونمائی کے بعد بھارتی کپتان روہت شرما نے کہا کہ ہم موسم کی صورت حال سے بخوبی واقف ہیں، ہم نے آئندہ 5 دنوں کا لائحہ عمل تیار کر لیا ہے۔

’آسٹریلین باؤلرز خطرناک ہیں، ان کا ڈٹ کر مقابلہ کرنے کی پوری کوشش کریں گے۔‘

دوسری جانب آسٹریلین کپتان پیٹ کمنز نے کہا کہ بھارتی ٹیم میں بیٹرز اور باؤلرز اچھی فارم میں ہیں، انڈین پریمیئز لیگ (آئی پی ایل) کے دوران بہت سے کھلاڑیوں کی کارکردگی کو دیکھا ہے۔

’نیوٹرل وینیو میں مقابلے کا مزہ آئے گا دونوں ٹیموں میں بہترین کھلاڑی ہیں، آخری دم تک لڑیں گے۔‘

آئی سی سی کی رپورٹ کے مطابق سابق پاکستانی کپتان اور فاسٹ باؤلر وسیم اکرم نے آئی سی سی ورلڈ ٹیسٹ چیمپئن شپ فائنل میں آسٹریلیا کو حاوی قرار دیا ساتھ ہی بھارتی فاسٹ باؤلرز کو ایک اہم مشورہ بھی دیا۔

سابق فاسٹ باؤلر وسیم اکرم نے بھارتی فاسٹ باؤلرزکو تحمل کا مظاہرہ کرنے کا مشورہ دیا اور کہا کہ نئی گیند سے پریشان نہ ہوں اور آسٹریلیا کے ٹاپ آرڈر کے خلاف تحمل سے کام لیں۔

آسٹریلین سابق کپتان رکی پونٹنگ نے بھی آسٹریلیا کو فیورٹ قرار دیتے ہوئے کہا کہ پچ کی صورتحال آسٹریلیا کے حق میں دکھائی دے رہی ہے۔