پاکستان سپر لیگ کے گیارہویں سیزن کا میلہ اپنے اختتامی مراحل کی جانب گامزن ہے جہاں پشاور زلمی اور ملتان سلطانز نے شاندار کارکردگی کی بنیاد پر اگلے مرحلے کے لیے اپنی جگہ پکی کر لی ہے۔ اب شائقین کی نظریں بقیہ 2 ٹیموں پر لگی ہیں جن کا فیصلہ آنے والے میچوں میں ہوگا۔
یہ بھی پڑھیں: پی ایس ایل 11: کراچی کنگز نے لاہور قلندرز کو سنسنی خیز مقابلے کے بعد 5 وکٹوں سے شکست دے دی
پشاور زلمی سترہ پوائنٹس کے ساتھ فہرست میں سب سے نمایاں ہے جبکہ ملتان سلطانز بارہ پوائنٹس لے کر پلے آف مرحلے تک رسائی پانے والی دوسری ٹیم بن گئی ہے۔ دوسری جانب کوئٹہ گلیڈی ایٹرز اور راولپنڈیز کی ٹیمیں مسلسل ناکامیوں کے بعد ایونٹ سے باہر ہوچکی ہیں، جہاں کوئٹہ نے 9 میچوں میں 6 اور راولپنڈیز نے محض2 پوائنٹس حاصل کیے۔
اب پلے آف کی آخری 2 نشستوں کے لیے اسلام آباد یونائیٹڈ، حیدرآباد کنگزمین، لاہور قلندرز اور کراچی کنگز کے درمیان کانٹے کا مقابلہ جاری ہے۔ اسلام آباد یونائیٹڈ 9 پوائنٹس کے ساتھ بہتر پوزیشن میں ہے اور اسے مزید 2 میچز کھیلنے ہیں، جبکہ حیدرآباد کنگزمین کے 8 پوائنٹس ہیں اور اس کے پاس بھی 2 میچز باقی ہیں۔
یہ بھی پڑھیں: پی ایس ایل 11: عثمان خان کی دھواں دار سینچری کی بدولت حیدرآباد کنگز مین نے ملتان سلطانز کو شکست دیدی
لاہور قلندرز اور کراچی کنگز کی ٹیمیں اپنے 9، 9 میچز کھیل کر 8،8 پوائنٹس حاصل کر سکی ہیں، ان دونوں ٹیموں کے پاس اب صرف ایک ایک موقع باقی ہے جس میں جیت ان کے لیے اگلے مرحلے کی امیدیں برقرار رکھ سکتی ہے۔
