سوشل میڈیا اور انٹرنیٹ پر ٹیسلا کے مبینہ ‘پائی فون’ کے حوالے سے گردش کرنے والی خبروں نے ٹیکنالوجی کی دنیا میں ایک نئی بحث چھیڑ دی ہے۔ وائرل ہونے والی رپورٹس میں دعویٰ کیا جا رہا ہے کہ ایلون مسک کی کمپنی ایک ایسا اسمارٹ فون متعارف کروانے جا رہی ہے جو روایتی سم کارڈ، وائی فائی اور چارجر کی ضرورت سے مکمل آزاد ہوگا۔
یہ بھی پڑھیں: بیٹری کے بعد اب موبائل فون بنانے والی چینی کمپنی بھی پنجے جھاڑ کر ٹیسلا کے پیچھے پڑگئی
ان رپورٹس کے مطابق یہ فون براہِ راست ‘اسپیس ایکس’ کے اسٹار لنک سیٹلائٹس سے منسلک ہوگا، جس کی بدولت دنیا کے کسی بھی دور افتادہ مقام پر انٹرنیٹ اور سگنلز کی دستیابی ممکن ہوگی، جبکہ فون کے عقب میں نصب سولر پینل اسے سورج کی روشنی سے خودکار طریقے سے چارج کریں گے۔
*TESLA PHONE*
No sim, No wifi & No charger
ٹیسلا نے اسمارٹ فون کی دنیا میں ایک بڑا انقلاب برپا کر دیا ہے!
ٹیسلا پائی فون (Tesla Pi Phone) اب حقیقت بننے جا رہا ہے، جس میں ایسی خصوصیات ہیں جو آپ نے پہلے کبھی نہیں دیکھی ہوں گی:
بغیر سم اور وائی فائی: یہ فون براہ راست اسپیس ایکس… pic.twitter.com/VpKfYv0lVj— Iram (Summan) Dar ♌ (@summandar01) April 25, 2026
انٹرنیٹ پر موجود معلومات میں سب سے حیران کن دعویٰ ‘نیورالنک’ سپورٹ کا ہے، جس کے ذریعے صارف مبینہ طور پر صرف اپنی سوچ سے فون کو کنٹرول کرسکے گا۔ اس کے علاوہ 789 ڈالر کی ممکنہ قیمت نے بھی صارفین کی توجہ حاصل کر لی ہے، جو کہ آئی فون اور دیگر فلیگ شپ فونز کے مقابلے میں کافی کم بتائی جا رہی ہے۔
تاہم، ٹیکنالوجی کے ماہرین اور مستند ذرائع کا کہنا ہے کہ ٹیسلا یا ایلون مسک کی جانب سے ابھی تک باضابطہ طور پر ایسے کسی فون کی تیاری یا لانچنگ کی تاریخ کا کوئی اعلان نہیں کیا گیا۔ ایلون مسک ماضی میں کئی بار کہہ چکے ہیں کہ وہ اسمارٹ فون بنانے کے حق میں نہیں ہیں جب تک کہ ایپل یا گوگل جیسے پلیٹ فارمز کوئی بڑی رکاوٹ نہ بنیں، کیونکہ ان کے نزدیک اسمارٹ فون ماضی کی ٹیکنالوجی بنتی جا رہی ہے۔
یہ بھی پڑھیں: ایلون مسک ایپل کے خلاف اعلان جنگ کرنے کیلئے تیار
ماہرین کے مطابق یہ تمام خصوصیات فی الحال صرف تصوراتی حد تک محدود ہیں اور تکنیکی طور پر ایک چھوٹے سے ہینڈ سیٹ میں طاقتور سیٹلائٹ انٹینا اور تیز رفتار سولر چارجنگ کی گنجائش پیدا کرنا ایک بڑا چیلنج ہے۔ اگرچہ ایلون مسک اپنی اختراعی سوچ کے لیے مشہور ہیں، لیکن ‘پائی فون’ کے حوالے سے پھیلنے والی بیشتر تفصیلات محض مداحوں کے بنائے ہوئے ڈیزائنز اور قیاس آرائیوں پر مبنی ہیں۔
فی الحال ٹیسلا کی تمام تر توجہ الیکٹرک گاڑیوں، مصنوعی ذہانت اور انسانی دماغ کو کمپیوٹر سے جوڑنے والے منصوبوں پر مرکوز ہے، اور اسمارٹ فون کی دنیا میں ان کا باقاعدہ داخلہ ابھی تک ایک معمہ بنا ہوا ہے۔
نوٹ: جو ویڈیو پوسٹ میں لگی ہے، وہ بھی اے آئی سے بنی پروموشنل ویڈیو ہے، جیسے بہت سی ریپلائیز میں لوگوں نے لکھا ہے۔
