وزیراعظم شہباز شریف سے چیئرمین پی سی بی محسن نقوی نے ملاقات کی، جس میں پی ایس ایل کے پلے آف مرحلے میں شائقین کو اسٹیڈیم آنے کی اجازت دینے کے معاملے پر تبادلہ خیال کیا گیا۔
مزید پڑھیں: صاحبزادہ فرحان کی ٹی20 کرکٹ میں حکمرانی، پاکستان سپر لیگ 11 میں بیٹنگ کا جادو
چیئرمین پی سی بی محسن نقوی کے مطابق انہوں نے وزیراعظم شہباز شریف سے ملاقات کی ہے جس میں پاکستان سپر لیگ (پی ایس ایل) کے پلے آف میچز میں شائقین کو اسٹیڈیم آنے کی اجازت مل گئی ہے۔
Just had a meeting with Prime Minister Shehbaz Sharif, and I’m pleased to share that we have secured his approval for public attendance in all three PSL playoff matches as well.
However, this comes with an important condition from his side that fans are strongly encouraged to… pic.twitter.com/SXtyhrIBpF
— Mohsin Naqvi (@MohsinnaqviC42) April 27, 2026
چیئرمین پاکستان کرکٹ بورڈ کے مطابق پلے آف میچز میں شائقین کو اسٹیڈیم آنے کی اجازت ہوگی۔ تاہم وزیراعظم کی جانب سے یہ شرط عائد کی گئی ہے کہ شائقین میچز میں شرکت کے لیے پبلک ٹرانسپورٹ استعمال کریں یا ایندھن کے کم سے کم استعمال کو یقینی بنائیں، تاکہ قومی کفایت شعاری مہم کے اہداف کو مدنظر رکھا جا سکے۔
محسن نقوی کے مطابق وزیراعظم شہباز شریف نے پلے آف میں شریک چاروں ٹیموں کے لیے نیک خواہشات کا اظہار بھی کیا ہے۔
انہوں نے کہا کہ شائقین کو ایک شاندار اور دلچسپ کرکٹ ایکشن دیکھنے کو ملے گا۔
اس سے قبل وزیراعظم شہباز شریف نے پی ایس ایل کے فائنل میں شائقین کرکٹ کو اسٹیڈیم آنے کی اجازت دینے کا اعلان کیا تھا۔
تاہم شائقین کرکٹ کے پرزور اصرار پر اب پلے آف میچز میں بھی شائقین کو اسٹیڈیم میں داخلے کی اجازت مل گئی ہے۔
واضح رہے کہ ایونٹ کے پلے آف مرحلے کا آغاز کل سے ہوگا۔
مزید پڑھیں: پاکستان سپر لیگ 11 کا فائنل: ٹکٹوں کی فروخت آج سے شروع، سب سے سستا ٹکٹ کتنے میں ملے گا؟
کراچی میں کوالیفائر میچ میں پشاور زلمی اور اسلام آباد یونائیٹڈ آمنے سامنے ہوں گی۔ اس کے بعد بدھ کے روز پہلا ایلی منیٹر لاہور میں کھیلا جائے گا جس میں حیدرآباد کنگز مین اور ملتان سلطانز مدمقابل ہوں گے۔
اس کے بعد دوسرا ایلی منیٹر یکم مئی کو لاہور ہی میں کھیلا جائے گا، جبکہ پی ایس ایل 11 کا فائنل 3 مئی کو قذافی اسٹیڈیم لاہور میں شیڈول ہے۔
