سندھ ہائیکورٹ نے یوٹیوبر رجب بٹ کی عبوری حفاظتی ضمانت منظور کرتے ہوئے پولیس کو انہیں گرفتار کرنے سے روک دیا ہے۔
یہ معاملہ سیشن عدالت کی جانب سے رجب بٹ کی درخواست ضمانت مسترد کیے جانے کے بعد سامنے آیا، جس پر وہ حفاظتی ضمانت کے لیے سندھ ہائیکورٹ سے رجوع ہوئے۔
یہ بھی پڑھیے: مشہور یوٹیوبر مسٹر بیسٹ کی کمپنی پر جنسی ہراسانی کا مقدمہ، سابق خاتون ملازم کے سنگین الزامات
سماعت کے دوران درخواست گزار کے وکیل نے مؤقف اختیار کیا کہ سیشن عدالت نے پہلے دی گئی عبوری ضمانت منسوخ کر دی تھی۔ وکیل کے مطابق رجب بٹ قانون پسند شہری ہیں اور متعلقہ مقدمے میں ٹرائل کا سامنا کر رہے ہیں، اس لیے انہیں گرفتاری سے تحفظ فراہم کیا جائے۔
عدالت نے دلائل سننے کے بعد رجب بٹ کی عبوری ضمانت منظور کرتے ہوئے حکم دیا کہ انہیں فوری طور پر گرفتار نہ کیا جائے۔
عدالت نے ملزم کو 50 ہزار روپے کے مچلکے جمع کرانے کا بھی حکم دیا ہے۔
یہ بھی پڑھیے: معروف ٹک ٹاکرز رجب بٹ اور ندیم نانی والا کو عدالت سے بڑا ریلیف مل گیا
رجب بٹ کے خلاف کراچی کے تھانہ حیدری میں مقدمہ درج ہے، تاہم مقدمے کی نوعیت اور مزید تفصیلات عدالت میں زیر سماعت ہیں۔
عدالت نے آئندہ سماعت پر متعلقہ حکام سے رپورٹ بھی طلب کر لی ہے۔
