لاس اینجلس میں منعقدہ انڈین فلم فیسٹیول میں پاکستانی سینما نے نمایاں کامیابی حاصل کرتے ہوئے تینوں منتخب فلموں کے لیے اعزازی تذکرے سمیٹ لیے۔
برصغیر سے تعلق رکھنے والی فلموں کے بڑے انتخاب میں پاکستان کی نمائندگی کرنے والی فلمیں لالی، گھوسٹ اسکول اور پرمیننٹ گیسٹ اپنی مضبوط کہانیوں اور منفرد موضوعات کے باعث جیوری کی توجہ حاصل کرنے میں کامیاب رہیں۔
ہدایتکار سرمد کھوسٹ کی فلم لالی اور سیماب گل کی گھوسٹ اسکول کو فیچر فلم کی کیٹیگری میں جیوری کی جانب سے اعزازی تذکرہ دیا گیا جبکہ ثناء جعفری کی مختصر فلم پرمیننٹ گیسٹ نے شارٹ فلم کیٹیگری میں یہی اعزاز حاصل کیا۔
View this post on Instagram
لالی ایک ڈارک کامیڈی ہے جو ازدواجی رشتوں میں موجود خوف، عدم تحفظ اور سماجی دباؤ کو موضوع بناتی ہے۔ فلم کی کہانی زیبا نامی لڑکی کے گرد گھومتی ہے، جس کے ماضی سے جڑی پراسرار اموات اسے معاشرتی بدشگونی کا استعارہ بنا دیتی ہیں۔ یہ فلم اس سے قبل برلن انٹرنیشنل فلم فیسٹیول میں بھی پیش کی جا چکی ہے، جہاں اسے مکمل پاکستانی کاسٹ اور عملے کے ساتھ پیش ہونے والی پہلی فلم ہونے کا اعزاز حاصل ہوا۔
دوسری جانب گھوسٹ اسکول دیہی پاکستان میں بند پڑے اسکولوں کے مسئلے کو اجاگر کرتی ہے۔ کہانی ایک کم عمر بچی رابعہ کی جدوجہد بیان کرتی ہے، جو اپنے اسکول کی اچانک بندش کے پس پردہ حقائق جاننے کے لیے سماجی رکاوٹوں اور فرسودہ نظام کا سامنا کرتی ہے۔ فلم کو ٹورنٹو انٹرنیشنل فلم فیسٹیول میں بھی پذیرائی مل چکی ہے۔
View this post on Instagram
ثناء جعفری کی مختصر فلم پرمیننٹ گیسٹ جنوبی ایشیائی معاشروں میں بچپن کے جنسی استحصال کے دیرپا اثرات پر روشنی ڈالتی ہے۔ لاہور کے پس منظر میں بنائی گئی یہ فلم ایک نوجوان لڑکی کی کہانی بیان کرتی ہے جو خاندانی ذمہ داریوں اور ماضی کے تکلیف دہ تجربات کے درمیان توازن قائم کرنے کی کوشش کرتی ہے۔
View this post on Instagram
تینوں فلموں کی اس کامیابی کو پاکستانی فلم انڈسٹری کے لیے ایک مثبت پیش رفت قرار دیا جا رہا ہے جو عالمی سطح پر ملک کے تخلیقی بیانیے اور اہم سماجی موضوعات کو اجاگر کرنے میں مددگار ثابت ہو رہی ہے۔
