وزیراعظم پاکستان شہباز شریف کی زیر صدارت وفاقی کابینہ کے اجلاس میں اہم فیصلے کرلیے گئے۔
اعلامیے کے مطابق وزیراعظم نے کابینہ اراکین کو مشرق وسطیٰ میں جاری کشیدگی میں کمی کے لیے پاکستان کی جانب سے کی جانے والی سفارتی کوششوں سے آگاہ کیا۔
انہوں نے عالمی سطح پر پیٹرولیم مصنوعات کی قیمتوں کے بحران کے باوجود عوامی سہولت کے لیے صورتحال کو بہتر انداز میں سنبھالنے پر اطمینان کا اظہار بھی کیا۔
اجلاس میں ملکی سطح پر ویکسین کی تیاری کی پالیسی کی منظوری دی گئی، جس کے تحت ڈریپ کی نگرانی میں قیمتوں کے تعین اور معیار کو یقینی بنانے کے لیے خصوصی کمیٹی تشکیل دینے کی بھی منظوری دی گئی۔
پالیسی کا مقصد ویکسین کی درآمد پر انحصار کم کرنا، زرمبادلہ کی بچت اور ملک کو خود کفیل بنانا ہے۔
کابینہ نے نیشنل ایگریکلچر بائیو ٹیکنالوجی پالیسی، نیشنل سیڈ پالیسی 2025 اور نیشنل اسکلز ڈیویلپمنٹ پالیسی کی بھی منظوری دی۔
ان پالیسیوں کا مقصد زرعی پیداوار میں اضافہ، غذائی تحفظ کو یقینی بنانا اور افرادی قوت کو جدید تقاضوں سے ہم آہنگ کرنا ہے۔
نیشنل اسکلز ڈیولپمنٹ پالیسی کے تحت وفاق اور صوبے مل کر کام کریں گے جبکہ نجی شعبے کو بھی اس میں شامل کیا جائے گا۔
بیرون ملک جانے والے پاکستانیوں کے لیے بین الاقوامی معیار کی تربیت اور سرٹیفیکیشن کے اقدامات بھی پالیسی کا حصہ ہوں گے۔
نیشنل سیڈ پالیسی کے تحت زرعی پیداوار میں 15 سے 20 فیصد اضافے اور عالمی معیار کی سیڈ کمپنیوں کے ساتھ شراکت داری کے اقدامات کیے جائیں گے، جبکہ نیشنل ایگریکلچر بائیو ٹیکنالوجی پالیسی کا مقصد تحقیق، ترقی اور زرعی بہتری کو فروغ دینا ہے۔
اجلاس میں نیپرا کی سالانہ رپورٹ 2025 اور اسٹیٹ آف انڈسٹری رپورٹ 2025 بھی پیش کی گئی۔
اختتام پر وفاقی وزیر برائے تخفیف غربت و سماجی تحفظ عمران احمد شاہ کی والدہ کے انتقال پر فاتحہ خوانی بھی کی گئی۔
