مکہ مکرمہ میں پائیداری اور ماحولیاتی بہتری کے لیے بڑے پیمانے پر شجرکاری مہم کے تحت 60 ہزار سے زائد درخت لگا دیے گئے ہیں، جبکہ المغمص ویلی پارک کو ایک نئے ماحولیاتی سیاحتی مرکز کے طور پر فروغ دیا جا رہا ہے۔
سعودی عرب نے مکہ مکرمہ کے مقدس مقامات پر ماحول کو بہتر بنانے اور حجاج کرام کو زیادہ آرام دہ ماحول فراہم کرنے کے لیے بڑے پیمانے پر شجرکاری مہم کے تحت 60 ہزار سے زائد درخت لگا دیے ہیں۔ سعودی پریس ایجنسی کے مطابق یہ اقدام مملکت کے پائیدار ترقی کے عزم کی عکاسی کرتا ہے۔
کدانہ ڈیولپمنٹ کمپنی، جو رائل کمیشن برائے مکہ مکرمہ و مشاعر مقدسہ کے تحت کام کرتی ہے، نے حال ہی میں 40 ہزار درخت لگائے، جبکہ اس سے قبل 20 ہزار سے زائد درخت پہلے ہی لگائے جا چکے تھے۔ اس طرح مجموعی طور پر سبزہ زاروں میں گزشتہ سال کے حج کے مقابلے میں 3 گنا اضافہ ہوا ہے، جس سے حجاج کے لیے ٹھنڈا اور خوشگوار ماحول میسر آئے گا۔
یہ منصوبہ سعودی وژن 2030 اور سعودی گرین انیشیٹو کے اہداف سے ہم آہنگ ہے، جس کا مقصد ترقی کے ساتھ ماحولیات کے تحفظ کو بھی یقینی بنانا ہے۔
اسی سلسلے میں المغمص ویلی پارک بھی توجہ کا مرکز بن رہا ہے، جو مکہ مکرمہ میں ایک اہم قدرتی محفوظ علاقہ اور ابھرتا ہوا ایکو ٹورازم مقام ہے۔ اس پارک میں صحرائی اور نیم صحرائی نباتات کی متنوع اقسام پائی جاتی ہیں، جن میں سخت موسمی حالات اور کم بارش میں بھی زندہ رہنے والے جنگلی درخت شامل ہیں۔
یہ علاقہ مختلف اقسام کے پرندوں، کیڑوں اور رینگنے والے جانوروں کے لیے بھی مسکن فراہم کرتا ہے، جس سے یہ حیاتیاتی تنوع کے تحفظ کے حوالے سے اہم حیثیت رکھتا ہے۔
المغمص پارک مملکت کی اس حکمت عملی کی عکاسی کرتا ہے جس کے تحت ایکو ٹورازم اور معیارِ زندگی کو بہتر بنانے پر توجہ دی جا رہی ہے، تاکہ شہریوں اور زائرین کو قدرتی ماحول تک رسائی فراہم کی جا سکے۔
ماہرین کے مطابق شجرکاری اور قدرتی مقامات کے فروغ جیسے اقدامات نہ صرف ماحول کے تحفظ میں مددگار ہیں بلکہ حجاج کے روحانی سفر کو بھی مزید خوشگوار بناتے ہیں اور ماحول دوست سیاحت کے نئے مواقع پیدا کرتے ہیں۔
