کینیڈا کے مسسگا شہر میں ایک اہم عوامی مقام کو معروف سماجی رہنما ہارون خان کے نام سے منسوب کر دیا گیا ہے۔
کینیڈا کے شہر مسسگا کی سٹی کونسل نے اپنے 5 نومبر کے اجلاس میں فیصلہ کیا تھا کہ ٹلز ڈاؤن پارک سے گزرنے والی کثیر المقاصد پگڈنڈی کو ‘ہارون خان ٹریل’ کا نام دیا جائے۔ یہ اعزاز ہارون خان کی 4 دہائیوں پر محیط انسان دوست خدمات کے اعتراف میں دیا گیا ہے۔
یہ بھی پڑھیے: فینٹا پگڑی: تھرپارکر کا تاج جو دشمنیاں بھی مٹا دیتا ہے
ہارون خان نے پاکستان، بنگلہ دیش، بوسنیا اور صومالیہ سمیت مختلف ممالک میں فلاحی سرگرمیوں میں نمایاں کردار ادا کیا، جبکہ انہوں نے پسماندہ بچوں کے لیے تعلیمی ادارے بھی قائم کیے۔ وہ مقامی سطح پر بھی مختلف تنظیموں کے ساتھ رضاکارانہ خدمات انجام دیتے رہے ہیں۔
تقریب کے دوران پارک میں باضابطہ طور پر نئے نام کی تختی نصب کی گئی۔ اس موقع پر شہر کی میئر کیرولین پیرش، مقامی کونسلرز اور پولیس حکام نے شرکت کی اور ہارون خان کی خدمات کو خراج تحسین پیش کیا۔
یہ بھی پڑھیے: سعودی عرب: حقل میں عیدالفطر پر سیاحوں کا رش، النخیل پارک توجہ کا مرکز
واضح رہے کہ ہارون خان کو ماضی میں متعدد اعزازات سے بھی نوازا جا چکا ہے جن میں کینیڈا کی 125ویں سالگرہ کی یادگاری تختی اور اونٹاریو والنٹیئر سروس ایوارڈ شامل ہیں۔
