معروف پاکستانی ڈرامہ نگار خلیل الرحمان قمر نے انکشاف کیا ہے کہ انہیں بھارتی فلم ساز سنجے لیلا بھنسالی کے متوقع پراجیکٹ ’ہیرا منڈی‘ کے اسکرپٹ کی پیشکش کی گئی تھی جس کی ابتدا میں ایک فلم کے طور پر منصوبہ بندی کی جا رہی تھی۔
یہ بات انہوں نے حال ہی میں ارشاد بھٹی کے پوڈکاسٹ میں گفتگو کے دوران کہی۔ خلیل الرحمان قمر نے بتایا کہ اس وقت اس پراجیکٹ کا نام ’ہیرا منڈی‘ نہیں بلکہ ’منڈی‘ رکھا گیا تھا اور انہیں اس کا اسکرپٹ لکھنے کی پیشکش براہِ راست بھارت سے کی گئی تھی۔
ان کے مطابق انہیں بھارت سے طویل دورانیے کی کالز موصول ہوئیں تاہم انہوں نے ’حب الوطنی‘ کی بنیاد پر اس پیشکش کو قبول نہیں کیا۔ بعد ازاں انہوں نے مؤقف اختیار کیا کہ پاکستانی تخلیق کاروں کو بھی وہی احترام دیا جانا چاہیے جو بھارتی فنکاروں کو پاکستان میں ملتا ہے۔
یہ بھی پڑھیں: خلیل الرحمان قمر کا ڈرامہ ’میرے پاس تم ہو‘ کس فلم کی نقل ہے؟
خلیل الرحمان قمر نے مزید کہا کہ انہوں نے واضح کیا تھا کہ اگر انہیں مناسب عزت و احترام دیا جائے تو وہ یہ منصوبہ بغیر معاوضے کے بھی کرنے کو تیار ہیں۔ ان کے مطابق انہیں 2015 میں دوبارہ اس پراجیکٹ کی پیشکش کی گئی تاہم انہوں نے بھارت جانے سے انکار کر دیا۔
انہوں نے یہ بھی دعویٰ کیا کہ پراجیکٹ کے تخلیق کار نے کہا تھا کہ اگر وہ اس پر کام نہیں کریں گے تو یہ فلم نہیں بن سکے گی۔ بعد ازاں جب انہوں نے ’ہیرا منڈی‘ کا ٹیزر دیکھا تو انہیں اندازہ ہوا کہ یہ منصوبہ فلم کے بجائے ویب سیریز کی صورت میں تیار کیا گیا ہے۔
