عالمی شہرت یافتہ گلوکارہ شکیرا نے فٹبال ورلڈ کپ 2026 کے لیے اپنا آفیشل گانا پیش کر دیا ہے جسے بھرپور توجہ حاصل ہو رہی ہے۔
کولمبیا سے تعلق رکھنے والی 49 سالہ عالمی شہرت یافتہ گلوکارہ نے اپنے نئے گانے ’ڈائی ڈائی‘ کی جھلک سوشل میڈیا پر شیئر کی۔ یہ گانا امریکا، میکسیکو اور کینیڈا میں منعقد ہونے والے فٹبال ورلڈ کپ 2026 کا آفیشل ترانہ ہوگا۔
یہ بھی پڑھیں: معروف امریکی پاپ اسٹار برٹنی اسپئیرز نے اپنے گانوں کے حقوق کتنے میں فروخت کیے؟
شکیرا نے برازیل کے معروف Maracana Stadium سے ایک ویڈیو جاری کی، جس میں گانے کے چند مناظر اور موسیقی سنائی گئی۔ گانا 14 مئی کو باقاعدہ طور پر ریلیز کیا جائے گا جبکہ اس میں نائجیریا کے معروف گلوکار Burna Boy بھی شریک ہیں۔
یہ شکیرا کا دوسرا آفیشل ورلڈ کپ ترانہ ہے۔ اس سے قبل انہوں نے 2010 کے فٹبال ورلڈ کپ کے لیے مشہور زمانہ گانا ’واکا واکا‘ پیش کیا تھا جو دنیا بھر میں بے حد مقبول ہوا اور آج بھی ورلڈ کپ کے یادگار ترین ترانوں میں شمار کیا جاتا ہے۔
یہ بھی پڑھیں: نیویارک میں کتوں کا فیشن شو، نامور شخصیات کی شرکت، مقصد کیا تھا؟
اس کے علاوہ شکیرا نے 2014 کے ورلڈ کپ کے لیے ’لا لا لا‘ بھی گایا تھا جسے انہوں نے اختتامی تقریب میں براہِ راست پیش کیا۔ 2006 کے ورلڈ کپ کی اختتامی تقریب میں بھی ان کی پرفارمنس کو شائقین نے بے حد سراہا تھا۔
واضح رہے کہ کولمبیا کی قومی ٹیم بھی 48 ٹیموں پر مشتمل فٹبال ورلڈ کپ 2026 میں شرکت کرے گی، جو 11 جون سے 19 جولائی تک امریکا، میکسیکو اور کینیڈا میں منعقد ہوگا۔
