وفاقی وزیر اقتصادی امور احد چیمہ کی زیرِ صدارت ایک اہم اجلاس ہوا، جس میں برآمدات کے فروغ سے متعلق مختلف اسکیموں اور تجاویز کا جائزہ لیا گیا۔
اجلاس میں وزیر مملکت برائے خزانہ بلال اظہر کیانی، گورنر اسٹیٹ بینک، سیکریٹری خزانہ اور دیگر اعلیٰ حکام نے شرکت کی۔
اجلاس کے دوران آئندہ بجٹ میں برآمد کنندگان کو مؤثر اور ہدفی سہولیات فراہم کرنے کے اقدامات پر غور کیا گیا۔
احد چیمہ نے کہاکہ حکومت برآمدات میں اضافے کے لیے سنجیدہ ہے اور اس مقصد کے لیے کارکردگی پر مبنی مراعات متعارف کرانے کی تجاویز زیرِ غور ہیں۔
انہوں نے کہاکہ برآمدات بڑھانے کے لیے صرف ٹیکسوں میں کمی کافی نہیں بلکہ انفراسٹرکچر اور دیگر اہم عوامل پر بھی توجہ دینا ضروری ہے۔
اجلاس میں چھوٹے اور درمیانے درجے کے کاروبار کو عالمی منڈیوں تک رسائی دینے کے لیے خصوصی اقدامات پر بھی غور کیا گیا۔
احد چیمہ نے پائیدار اور کارکردگی پر مبنی ایکسپورٹ فریم ورک اپنانے کی ضرورت پر زور دیتے ہوئے کہاکہ برآمدی اہداف حاصل کرنے والے اداروں کو ہر ممکن تعاون فراہم کیا جائے گا۔
انہوں نے مزید کہاکہ برآمدی مصنوعات میں تنوع اور ویلیو ایڈیشن پر توجہ دینا وقت کی اہم ضرورت ہے، جبکہ حکومت برآمدات پر مبنی معاشی ترقی کے لیے تمام متعلقہ فریقین سے مشاورت کے بعد پالیسی مرتب کرے گی۔
