قومی اسمبلی نے معرکہ حق کا ایک سال مکمل ہونے پر افواج پاکستان کو خراج تحسین پیش کرنے کی قرار داد منظور کرلی۔
وفاقی وزیر قانون اعظم نذیر تارڑ نے قرار داد ایوان میں پیش کی، جسے منظور کرلیا گیا۔
اس موقع پر اسپیکر قومی اسمبلی سردار ایاز صادق نے کہاکہ بھارت نے رات کی تاریکی میں حملہ کیا جس کا پاکستان نے دن کی روشنی میں جواب دیا۔
قومی اسمبلی کے اجلاس کی صدارت کرتے ہوئے سردار ایاز صادق نے معرکہ حق کا ایک سال مکمل ہونے پر افواج پاکستان کو خراج تحسین پیش کیا۔
انہوں نے کہاکہ معرکہ حق میں پاکستان کو شاندار کامیابی حاصل ہوئی، بزدل دشمن نے رات کی تاریکی میں حملہ کیا لیکن پاکستان نے دن کی روشنی میں جواب دیا۔
انہوں نے کہاکہ پوری دنیا جان چکی ہے کہ پہلگام واقعہ ایک فالس فلیگ آپریشن تھا۔
اسپیکر قومی اسمبلی نے فیلڈ مارشل عاصم منیر، سربراہ پاک فضائیہ ظہیر احمد بابر سدھو اور بحریہ کے سربراہ ایڈمرل نوید اشرف کو خراج تحسین پیش کیا۔
اسپیکر قومی اسمبلی نے مزید کہاکہ پاکستان خطے میں امن کے لیے کوشاں ہے۔
انہوں نے کہاکہ معرکہ حق میں پاک فضائیہ نے دشمن کے 8 جہاز گرائے، جبکہ پاک بحریہ نے دشمن کو روک کر رکھا اور اسے آگے بڑھنے کی جرات نہیں ہوئی۔ پوری قوم اس موقع پر افواج پاکستان کے ساتھ کھڑی تھی۔
