وفاقی وزیر تعلیم ڈاکٹر خالد مقبول صدیقی نے کیمبرج امتحانی پرچوں کے لیک ہونے کا نوٹس لیتے ہوئے واقعے پر گہری تشویش اور افسوس کا اظہار کیا ہے۔
انہوں نے کہاکہ محنتی طلبہ کے مستقبل سے کھیلنے کی کسی صورت اجازت نہیں دی جا سکتی۔
ان کے مطابق گزشتہ سال بھی اسی نوعیت کے واقعات سامنے آئے تھے، اس لیے کیمبرج کو اپنے امتحانی نظام کو مزید مضبوط اور مؤثر بنانا چاہیے۔
وفاقی وزیر تعلیم نے کہاکہ پیپر لیک ہونے کے واقعات سے طلبہ اور والدین شدید ذہنی دباؤ کا شکار ہوتے ہیں، جو قابلِ تشویش ہے۔
انہوں نے انٹر بورڈ کمیٹی آف چیئرمین (آئی بی سی سی) کو کیمبرج کے ساتھ فوری اجلاس کرنے کی ہدایت بھی جاری کی ہے، جبکہ آئی بی سی سی کو طلبہ کے مفادات کے تحفظ کے لیے فوری اقدامات کرنے کی تاکید کی گئی ہے۔
ڈاکٹر خالد مقبول صدیقی نے کہا کہ شفاف امتحانی نظام اور میرٹ پر کسی قسم کا سمجھوتہ نہیں کیا جائے گا۔ انہوں نے مطالبہ کیا کہ کیمبرج اس معاملے کی مکمل تحقیقات کرے اور حقائق سامنے لائے۔
وفاقی وزیر کے مطابق طلبہ کے اعتماد کی بحالی حکومت کی اولین ترجیح ہے۔
واضح رہے کہ کیمبرج کے جاری امتحانات میں آج ہونے والا ریاضی کا پرچہ بھی وقت سے قبل لیک ہوگیا، جبکہ اس سے قبل ہونے والے پرچے بھی وقت سے قبل سامنے آ چکے ہیں۔
