کیمبرج انٹرنیشنل ایجوکیشن نے اے ایس لیول ریاضی کے پرچے کے قبل از وقت لیک ہونے کی تصدیق کرتے ہوئے پاکستان میں ایک اور متعلقہ امتحان ملتوی کرنے کا اعلان کر دیا ہے۔
کیمبرج کی جانب سے جاری میڈیا بیان کے مطابق 12 مئی کو ہونے والا اے ایس لیول میتھمیٹکس پیپر 52 (9709) انتظامی زون 3 اور 4 میں مقررہ وقت سے پہلے شیئر کیا گیا، جو امتحانی قواعد کی خلاف ورزی ہے۔
ادارے نے کہا ہے کہ معاملے کی مکمل تحقیقات جاری ہیں تاکہ لیک کے دائرہ کار اور آئندہ کے اقدامات کا تعین کیا جا سکے۔
بیان میں مزید کہا گیا ہے کہ احتیاطی اقدام کے طور پر پاکستان میں 15 مئی کو ہونے والا اے ایس لیول میتھمیٹکس پیپر 32 (9709) ملتوی کر دیا گیا ہے۔ اس کی نئی تاریخ کا اعلان 22 مئی تک کر دیا جائے گا اور امتحان دوبارہ منعقد کیا جائے گا۔
کیمبرج کے مطابق اے ایس اور اے لیول کے نتائج کی تاریخ 11 اگست ہی برقرار رہے گی اور اس میں کوئی تبدیلی نہیں کی گئی۔
کیمبرج پاکستان کی کنٹری ڈائریکٹر عظمیٰ یوسف نے کہا کہ ادارے کی اولین ترجیح یہ ہے کہ اس واقعے سے طلبہ متاثر نہ ہوں۔
ان کا کہنا تھا کہ امتحانی شفافیت اور گریڈنگ سسٹم کی ساکھ برقرار رکھنے کے لیے تمام ممکنہ اقدامات کیے جا رہے ہیں تاکہ جامعات اور دیگر اداروں کا اعتماد برقرار رہے۔
انہوں نے کہا کہ موجودہ امتحانی سیزن میں پیپر لیک اور چوری کے واقعات غیر معمولی ہیں، اور ممکن ہے کہ اس کے پیچھے ایسے عناصر ہوں جو امتحانی نظام اور طلبہ کے مستقبل کو نقصان پہنچانا چاہتے ہیں۔
کیمبرج نے مزید کہا کہ ذمہ دار عناصر کے خلاف قانونی اور انتظامی کارروائی کے مختلف پہلوؤں پر کام جاری ہے۔ ادارے کے مطابق ہر شکایت کی باقاعدہ تحقیقات کی جاتی ہے، تاہم وہ انفرادی کیسز پر تبصرہ نہیں کرتا۔
کیمبرج نے طلبہ اور والدین سے اپیل کی ہے کہ وہ صرف سرکاری بیانات پر اعتماد کریں اور سوشل میڈیا پر پھیلنے والی غیر مصدقہ معلومات سے گریز کریں۔
