کراچی ایک بار پھر 23 مئی کو لائف بوائے ون رن انٹرنیشنل ہاف میراتھن کی میزبانی کے لیے تیار ہے، جہاں 1500 سے زیادہ رنرز کی شرکت متوقع ہے۔
یہ ایونٹ مقامی سطح پر ’اسپورٹس اِن پاکستان‘ کے زیر اہتمام اور لائف بوائے کے اشتراک سے منعقد کیا جا رہا ہے، جسے شہر کے بڑے رننگ ایونٹس میں شمار کیا جا رہا ہے۔
میراتھن میں مختلف عمر اور صلاحیتوں کے حامل افراد کے لیے 4 کیٹیگریز رکھی گئی ہیں، جن میں ایک کلومیٹر، 5 کلومیٹر، 10 کلومیٹر اور 21.1 کلومیٹر ہاف میراتھن شامل ہیں۔
ریس عبدالستار ایدھی روڈ سی ویو پر واقع ایمار اوشن فرنٹ، ڈی ایچ اے فیز 8 سے شروع ہو کر وہیں اختتام پذیر ہوگی۔
لائف بوائے ون رن ایونٹ خاندانوں، دوستوں اور فٹنس سے دلچسپی رکھنے والے افراد کو صحت مند طرزِ زندگی اپنانے اور عالمی رننگ کمیونٹی کا حصہ بننے کا موقع فراہم کرے گا۔
منتظمین کے مطابق لائف بوائے اس ایونٹ کے ذریعے صحت و صفائی کے ساتھ ساتھ فٹنس اور مجموعی صحت کے فروغ کو بھی قومی سطح پر اجاگر کر رہا ہے۔
دوسری جانب اسی روز روس، چین، سعودی عرب، برازیل، بھارت، متحدہ عرب امارات، قطر، وینزویلا، سربیا، تنزانیہ، ملائیشیا، تھائی لینڈ سمیت مختلف ممالک میں 2 لاکھ 45 ہزار سے زیادہ رنرز اپنے اپنے ملکوں میں ایونٹ میں حصہ لیں گے، جس سے یہ ایک عالمی سطح کا رننگ فیسٹیول بن جائے گا۔
کراچی میں ایونٹ کے منتظم شعیب نظامی نے کہا کہ شہر میں رننگ کلچر تیزی سے فروغ پا رہا ہے اور ہر سال مختلف شعبہ ہائے زندگی سے تعلق رکھنے والے افراد اس میں شریک ہو رہے ہیں۔
ان کا کہنا تھا کہ کراچی نہ صرف اپنی خوراک بلکہ صحت مند اور متحرک طرزِ زندگی کی وجہ سے بھی پہچانا جانا چاہیے، اور یہ ایونٹ دنیا کے سامنے شہر کا مثبت اور متحرک چہرہ اجاگر کرنے کا ایک اور موقع ہے۔
ون رن ایک سالانہ بین الاقوامی ہاف میراتھن ہے جو دنیا کے مختلف ممالک میں بیک وقت منعقد کی جاتی ہے، جس کا مقصد عالمی یکجہتی، صحت مند سرگرمیوں اور ثقافتی روابط کو فروغ دینا ہے۔
