پاکستان آرمی راکٹ فورس کمانڈ نے مقامی طور پر تیار کردہ فتح 4 گراؤنڈ لانچڈ کروز میزائل کا کامیاب تربیتی تجربہ کیا ہے۔
جدید ایویونکس اور جدید ترین نیویگیشنل معاون نظام سے لیس یہ میزائل طویل فاصلے تک اہداف کو انتہائی درستگی کے ساتھ نشانہ بنانے کی صلاحیت رکھتا ہے۔
یہ پڑھیں: پاکستان نیوی کا بحیرہ عرب میں جدید ترین میزائل کا کامیاب تجربہ
آئی ایس پی آر کے مطابق اس تربیتی تجربے کا مقصد فوجی دستوں کی آپریشنل صلاحیتوں میں اضافہ اور مختلف ذیلی نظاموں کے تکنیکی معیار کی جانچ کرنا تھا تاکہ میزائل کی درستگی اور دفاعی صلاحیت کو مزید بہتر بنایا جاسکے۔
بیان کے مطابق تجربے کا مشاہدہ پاکستان آرمی راکٹ فورس کمانڈ کے سینئر افسران کے علاوہ منصوبے سے وابستہ سائنس دانوں اور انجینئرز نے بھی کیا۔
مزید پڑھیں:پاکستان کا دفاع ناقابل تسخیر: آرمی راکٹ فورس کمانڈ نے فتح ٹو میزائل کا کامیاب تجربہ کرلیا
صدرِ پاکستان، وزیرِ اعظم، چیف آف آرمی اسٹاف، چیئرمین جوائنٹ چیفس آف اسٹاف کمیٹی، پاک بحریہ کے سربراہ اور پاک فضائیہ کے سربراہ نے فتح 4 کے کامیاب تربیتی تجربے پر متعلقہ ٹیموں کو مبارکباد پیش کی۔
دوسری جانب عسکری قیادت نے فتح سیریز کے میزائل پروگرام کی تیاری میں شامل سائنس دانوں، انجینئرز اور دیگر ماہرین کی پیشہ ورانہ مہارت، عزم اور کاوشوں کو سراہا۔
