چیئرمین پیپلز پارٹی بلاول بھٹو زرداری نے وزیراعظم آزاد کشمیر فیصل ممتاز راٹھور کو کشمیریوں سے کیے گئے وعدے پورے کرکے اگلے انتخابات کی تیاری کرنے کی ہدایت کی ہے۔
پاکستان پیپلز پارٹی کے چیئرمین بلاول بھٹو زرداری سے آزاد جموں و کشمیر کے وزیراعظم فیصل ممتاز راٹھور نے زرداری ہاؤس اسلام آباد میں ملاقات کی۔
یہ بھی پڑھیں: موجودہ حکومت کی کامیابی ہے کہ عوام کا ریاستی نظام پراعتماد بحال ہوا ہے، وزیراعظم آزاد کشمیر
ملاقات کے دوران وزیراعظم فیصل ممتاز راٹھور نے چیئرمین بلاول بھٹو زرداری کو آزاد کشمیر کی موجودہ سیاسی صورت حال اور وہاں جاری عوامی حکومت کے ترقیاتی منصوبوں کے بارے میں تفصیلی بریفنگ دی۔
گفتگو کے دوران چیئرمین بلاول بھٹو زرداری نے واضح کیا کہ پاکستان پیپلز پارٹی نے آزاد جموں و کشمیر کے عوام سے کیے گئے وعدوں کی تکمیل کی خاطر انہیں وزیراعظم کی ذمہ داری سونپی ہے۔
انہوں نے مزید کہا کہ کشمیری عوام سے کیے گئے وعدے ایک امانت کی حیثیت رکھتے ہیں اور پیپلز پارٹی امانت میں خیانت کرنے پر یقین نہیں رکھتی۔
یہ بھی پڑھیں: وزیراعظم آزاد کشمیر سے بلاول بھٹو زرداری کی ملاقات، آئندہ انتخابات پر تبادلہ خیال
بلاول بھٹو زرداری نے وزیراعظم فیصل ممتاز راٹھور کو ہدایت جاری کی کہ وہ عوامی وعدوں کو فی الفور مکمل کریں اور اپنی تمام تر توجہ اگلے انتخابات کی تیاریوں پر مرکوز کریں۔
