جنوبی امریکا پیدل جانے کا خواب لیے روسی شہری ڈرون حملے میں ہلاک

37 سالہ ساشا، جن کا اصل نام الیگزینڈر بتایا جاتا ہے، گزشتہ ماہ اس وقت انٹرنیٹ پر مقبول ہوئے جب مختلف ڈرائیورز نے انہیں شاہراہوں پر اپنی چھوٹی سی ہاتھ سے تیار کردہ گاڑی کھینچتے ہوئے فلمایا۔ وہ اس گاڑی کو اپنا موبائل گھر قرار دیتے تھے۔

میڈیا رپورٹس کے مطابق ساشا نے روس کے مغربی علاقے ریازان سے اپنا سفر شروع کیا تھا اور ان کا مقصد برازیل کے شہر ریو ڈی جنیرو تک پیدل پہنچنا تھا۔

بتایا جاتا ہے کہ وہ روزانہ تقریباً 30 کلومیٹر سفر طے کرتے تھے۔

 مزید پڑھیں: یوکرین کے روس پر بڑے پیمانے پر ڈرون حملے، آئل ریفائنری نذرِ آتش، 3 ہلاک

جنوری میں ایک مقامی ویب سائٹ کو دیے گئے انٹرویو میں ساشا نے کہا تھا کہ وہ خود کو آزمانا چاہتے ہیں اور یہ دیکھنا چاہتے ہیں کہ جنوبی امریکا میں وہ کتنے عرصے تک زندہ رہ سکتے ہیں۔

‘انہوں نے یہ بھی کہا تھا کہ انہیں اس سفر کے خطرات کا اندازہ ہے اورکوئی بھی دن ان کی زندگی کا آخری دن ہوسکتا ہے۔’

ٹیلیگرام چینل ‘ماش’ نے ساشا کا ایک آخری انٹرویو بھی جاری کیا، جس میں انہوں نے کہا تھا کہ اس زندگی میں ہر انسان کا ایک راستہ ہوتا ہے۔

 مزید پڑھیں: کینیا کے شہریوں کی یوکرین میں فوجی بھرتی بند کرنے پر روس کا اتفاق

 ‘قسمت فیصلہ کرتی ہے کہ یہ راستہ مختصر ہوگا یا طویل، لیکن خوشگوار بنانا ہمارے اپنے ہاتھ میں ہوتا ہے۔’

روسی حکام کے مطابق یوکرین کی جانب سے سرحدی علاقوں میں ڈرون حملوں کا سلسلہ جاری ہے، جن میں بعض اوقات شہری علاقوں اور عام گاڑیوں کو بھی نشانہ بنایا جاتا ہے۔

رواں ماہ کے آغاز میں بھی بیلگورود علاقے میں ایک ڈرون حملے میں موٹر سائیکل پر سوار 2 نوجوان ہلاک ہوگئے تھے۔