پاکستانی اداکارہ صنم سعید نے کانز فلم فیسٹیول 2026 میں پاکستان کی نمائندگی کرتی نظر آئیں جہاں انہوں نے پاکستانی فیشن اور ثقافت کو اجاگر کیا۔
صنم سعید نے ریڈ کارپٹ پر معروف ڈیزائنر حسین رہر کے تیار کردہ خصوصی لباس میں شرکت کی جسے انتہائی محنت اور مہارت سے تیار کیا۔ ڈیزائنر کے مطابق اس لباس کی کڑھائی مکمل کرنے میں 50 کاریگروں نے مجموعی طور پر 2,354 گھنٹے صرف کیے۔
View this post on Instagram
اداکارہ نے اپنے پیغام میں کہا کہ وہ کسی برانڈ یا فلمی ٹیم کی نمائندگی کے بجائے ایک جنوبی ایشیائی خاتون کے طور پر پاکستان کے ثقافتی ورثے کی نمائندگی کر رہی ہیں۔ ان کا کہنا تھا کہ وہ پاکستان کی ان تمام خواتین کے لیے ریڈ کارپٹ پر چلیں جو انڈسٹری کے پس پردہ کام کرتی ہیں، لکھتی ہیں، ڈیزائن کرتی ہیں اور خواب دیکھتی ہیں۔
انہوں نے مزید کہا کہ خواتین پاکستانی انٹرٹینمنٹ انڈسٹری کی محافظ ہیں اور وہ اپنے ساتھ ماضی، حال اور مستقبل کی تمام خواتین کی نمائندگی لے کر چل رہی ہیں۔ صنم سعید کے مطابق ان کے لباس میں روایتی اور جدید فیشن کا امتزاج پیش کیا گیا ہے جس میں انارکلی طرز کے ساتھ ہاؤٹ کاؤچر اور عالمی فیشن رجحانات کو شامل کیا گیا ہے۔
View this post on Instagram
لباس خالص ریشم اور شفان سے تیار کیا گیا جبکہ اس پر روایتی مُکیش کڑھائی بہاولپور کی خواتین کاریگروں نے ہاتھ سے کی۔ اداکارہ کے مطابق ان کے بالوں میں لگے پھول لاہور اور ہیوسٹن سے تعلق رکھنے والی ایک کم عمر مددگار نے باغ سے چن کر تیار کیے جنہیں ان کی والدہ کی معاونت سے ہار کی صورت دی گئی۔
صنم سعید نے اپنی یہ شرکت پاکستان کی لیجنڈری اداکارہ شمیم آرا کے نام بھی کی جنہوں نے فلم انڈسٹری میں خواتین کے لیے نئی راہیں ہموار کیں۔
اداکارہ کی یہ شرکت نہ صرف پاکستانی ثقافت اور فیشن انڈسٹری کی عالمی سطح پر نمائندگی کا ذریعہ بنی بلکہ انہیں بین الاقوامی پلیٹ فارم پر خواتین کی تخلیقی صلاحیتوں کی علامت کے طور پر بھی دیکھا جا رہا ہے۔
