محکمہ موسمیات نے ملک کے مختلف علاقوں میں آئندہ چند روز کے دوران موسم کی صورتحال کے حوالے سے پیشگوئی جاری کی ہے، جس کے مطابق شمالی علاقوں میں بارش اور ژالہ باری جبکہ جنوبی حصوں میں شدید گرمی کی لہر متوقع ہے۔
محکمہ موسمیات کے مطابق آج سے 23 مئی تک خیبرپختونخوا کے مختلف علاقوں میں بارش اور ژالہ باری کا امکان ہے، جبکہ پنجاب اور اسلام آباد کے مختلف حصوں میں بھی اسی نوعیت کی موسمی سرگرمیوں کی توقع ظاہر کی گئی ہے۔
اسی طرح آزاد کشمیر اور گلگت بلتستان میں بھی بارش اور ژالہ باری کا امکان ظاہر کیا گیا ہے۔
دوسری جانب نیشنل ڈیزاسٹر مینجمنٹ اتھارٹی (این ڈی ایم اے) نے خبردار کیا ہے کہ 19 مئی سے سندھ، جنوبی پنجاب اور مشرقی بلوچستان میں گرمی کی شدت میں اضافہ ہوگا اور ان علاقوں میں ہیٹ ویو کی صورتحال پیدا ہونے کا خدشہ ہے۔
این ڈی ایم اے کے مطابق 19 سے 26 مئی کے دوران بعض مقامات پر درجہ حرارت 42 ڈگری سینٹی گریڈ سے تجاوز کر سکتا ہے، جس کے نتیجے میں صحت کے مسائل بڑھنے کا امکان ہے۔
ترجمان این ڈی ایم اے نے شہریوں کو ہدایت کی ہے کہ وہ شدید دھوپ میں غیر ضروری طور پر باہر نکلنے سے گریز کریں، زیادہ سے زیادہ پانی کا استعمال کریں اور جسم میں پانی اور نمکیات کی کمی سے بچیں۔
ادارے نے یہ بھی خبردار کیا ہے کہ درجہ حرارت میں اضافے کے باعث شمالی علاقوں میں گلیشیئرز کے پگھلنے اور لینڈ سلائیڈنگ کے خطرات بھی بڑھ سکتے ہیں۔
