کراچی اور اسلام آباد کے سینیئر صحافیوں نے وی نیوز اسلام آباد آفس کا دورہ کیا۔
صدر پاکستان فیڈرل یونین آف جرنلسٹس افضل بٹ کی قیادت میں کراچی پریس کلب کے صدر، معروف شاعر اور سینیئر صحافی فاضل جمیلی، سینئر صحافی، تجزیہ کار اور کالم نگار مظہر عباس، سابق صدر نیشنل پریس کلب و بیورو چیف آج ٹی وی طارق چودھری اور سابق سیکریٹری نیشنل پریس کلب و بیورو چیف 365 نیوز نیئر علی وی نیوز پہنچے تو چیف ایڈیٹر عمار مسعود نے معزز مہمانوں کا استقبال کیا۔
مہمانوں نے وی نیوز کے مختلف شعبہ جات کا دورہ کیا اور ادارے میں فراہم کی گئی جدید سہولیات، بہترین ورکنگ ماحول اور پروفیشنل اندازِ کار کو سراہا۔
اس موقع پر مہمانوں کے اعزاز میں ہائی ٹی کا بھی اہتمام کیا گیا، جہاں چائے اور دیگر لوازمات کے ساتھ ساتھ حالاتِ حاضرہ اور صحافیوں کو درپیش مسائل پر تفصیلی گفتگو ہوئی۔
مظہرعباس اور طارق چوہدری نے کئی دلچسپ صحافتی واقعات سنائے۔
سینئر صحافیوں کی وی نیوز آمد۔کراچی اور اسلام آباد کے سینئر صحافیوں فاضل جمیلی، مظہر عباس، افضل بٹ، طارق چودھری اور نیئر علی نے وی نیوز اسلام آباد کا دورہ کیا۔ چیف ایڈیٹر وی نیوز عمار مسعود نے معزز مہمانوں کا استقبال کیا۔ مہمانوں کو وی نیوز کی جانب سے تحائف بھی پیش کیے گئے pic.twitter.com/WTKnXLoduh
— WE News (@WENewsPk) May 19, 2026
وی نیوز کی ٹیم سے موسیٰ کلیم، اسداللہ، مشکور علی، رمشا عارف اور عمیر خان بھی گفتگو میں شریک رہے۔ فاضل جمیلی کی موجودگی سے فائدہ اٹھاتے ہوئے ان سے کلام سنانے کی درخواست کی گئی، جس پر انہوں نے اپنی شہرۂ آفاق نظمیں ’مجھے کمرہ بدلنا ہے‘ اور ’درختوں کے لیے‘ سنائیں اور حاضرین سے بھرپور داد وصول کی۔
نظم ’درختوں کے لیے‘:
اے درختو! تمہیں جب کاٹ دیا جائے گا
اور تم سوکھ کے لکڑی میں بدل جاؤ گے
ایسے عالم میں بہت پیش کشیں ہوں گی تمہیں
تم مگر اپنی روایت سے نہ پھرنا ہرگز
شاہ کی کرسی میں ڈھلنے سے کہیں بہتر ہے
کسی فٹ پاتھ کے ہوٹل کا وہ ٹوٹا ہوا تختہ بننا
میلے کپڑوں میں سہی لوگ محبت سے جہاں بیٹھتے ہیں
کسی بندوق کا دستہ بھی نہیں ہونا تمہیں
چاقو چھریوں کو بھی خدمات نہ اپنی دینا
ایسے دروازے کی چوکھٹ بھی نہ بننا ہرگز
جو محبت بھری دستک پہ کبھی کھل نہ سکے
اے درختو! تمہیں جب کاٹ دیا جائے گا
اور تم سوکھ کے لکڑی میں بدل جاؤ گے
کوئی بیساکھی بنائے تو سہارا دینا
اور کشتی کے لیے اتنی محبت سے تم آگے بڑھنا
کہ سمندر کی فراخی بھی بہت کم پڑ جائے
اپنے پتوار مرے بازوؤں جیسے رکھنا
جو کسی اور کی طاقت کے سوا زندہ ہیں
میری دنیا کہ ابھی واقف الفت ہی نہیں
میرے بازو بھی محبت کے سوا زندہ ہیں
کراچی و اسلام آباد کے سینئر صحافیوں کا وی نیوز آفس کا دورہ، فاضل جمیلی نے کلام سنا کر سماں باندھ دیا.@faziljamili @Afzalbutt01 @Nayyer_Aliz @MazharAbbasGEO @tariqchaaj @ammarmasood3 pic.twitter.com/zNcX3zshL9
— MashkoorAli (@MashkoorAli76) May 20, 2026
صدر پاکستان فیڈرل یونین آف جرنلسٹس افضل بٹ نے 21 اور 22 مئی کو منعقد ہونے والے ویمن جرنلسٹس کنونشن اور تیسرے نیشنل جرنلسٹس کنونشن کی تیاریوں پر بھی گفتگو کی۔ چیف ایڈیٹر وی نیوز عمار مسعود نے افضل بٹ کی صحافی برادری کے لیے گراں قدر خدمات کو سراہتے ہوئے ان کی استقامت کے لیے نیک تمناؤں کا اظہار کیا۔
دورے کے اختتام پر چیف ایڈیٹر وی نیوز عمار مسعود نے ادارے کی جانب سے معزز مہمانوں کو یادگاری تحائف بھی پیش کیے۔
