وزیراعظم پاکستان شہباز شریف سے برطانیہ کے قومی سلامتی کے مشیر جوناتھن پاول نے وزیراعظم ہاؤس میں ملاقات کی۔
ملاقات میں نائب وزیراعظم و وزیر خارجہ اسحاق ڈار، وزیراعظم کے معاونِ خصوصی طارق فاطمی، سیکریٹری خارجہ آمنہ بلوچ اور سیکریٹری نیشنل سیکیورٹی ڈویژن ساجد بلوچ بھی موجود تھے۔
Mr. Jonathan Powell, the UK’s National Security Adviser, called on Prime Minister Muhammad Shehbaz Sharif. Islamabad, 20 May 2026. pic.twitter.com/M5kK7pQwor
— Prime Minister’s Office (@PakPMO) May 20, 2026
ملاقات کے دوران وزیراعظم شہباز شریف نے برطانیہ کے ساتھ مضبوط، مثبت اور مستقبل پر مبنی تعلقات کو مزید فروغ دینے کے لیے پاکستان کے پختہ عزم کا اعادہ کیا۔
انہوں نے کہا کہ برطانیہ پاکستان کا ایک دیرینہ اسٹریٹجک شراکت دار ہے۔
وزیراعظم نے برطانوی وزیراعظم کیئر اسٹارمر کے لیے نیک تمناؤں کا اظہار کرتے ہوئے گزشتہ ماہ دونوں رہنماؤں کے درمیان ہونے والی خوشگوار اور دوستانہ ٹیلیفونک گفتگو کا بھی ذکر کیا، جس میں پاکستان اور برطانیہ کے تعلقات کو مزید مستحکم بنانے کی مشترکہ خواہش کا اظہار کیا گیا تھا۔
جوناتھن پاول نے علاقائی سفارت کاری میں پاکستان کے تعمیری کردار، خصوصاً خطے میں مذاکرات کے فروغ اور کشیدگی میں کمی کے لیے جاری کوششوں کو سراہتے ہوئے برطانوی حکومت کی جانب سے پزیرائی کا اظہار کیا۔
انہوں نے حکومتِ پاکستان کی مؤثر معاشی اصلاحات پر وزیراعظم کو مبارکباد دیتے ہوئے کہاکہ برطانوی حکومت سلامتی، تجارت، سرمایہ کاری اور ترقیاتی شعبوں میں دوطرفہ تعاون کو مزید وسعت دینے میں گہری دلچسپی رکھتی ہے۔
