کراچی میں آوارہ اور خونخوار کتوں کے حملے کا افسوسناک واقعہ سامنے آیا ہے جہاں قربانی کے لیے لائے گئے ایک دنبے کو کتوں نے حملہ کرکے ہلاک کردیا۔ واقعے کی سی سی ٹی وی فوٹیج بھی منظر عام پر آگئی۔
شہر قائد میں نیشنل اسٹیڈیم کے قریب واقع ایک نجی ہاؤسنگ سوسائٹی میں کئی آوارہ کتوں نے بندھے ہوئے قربانی کے جانور کو گھیر لیا اور اس پر پے در پے حملے کیے۔
سامنے آنے والی سی سی ٹی وی فوٹیج میں دیکھا جا سکتا ہے کہ بے زبان جانور نے خود کو بچانے کی کوشش کی، تاہم خونخوار کتوں نے اسے بری طرح زخمی کر دیا۔
فوٹیج میں واضح ہے کہ متعدد کتوں کے مسلسل حملوں کے باعث دنبہ شدید زخمی ہو کر لہولہان ہوگیا اور بعد ازاں زخموں کی تاب نہ لاتے ہوئے دم توڑ گیا۔
واقعے کے بعد علاقے کے مکینوں میں خوف و ہراس پھیل گیا جبکہ شہریوں نے آوارہ کتوں کے بڑھتے ہوئے خطرے پر تشویش کا اظہار کرتے ہوئے متعلقہ اداروں سے فوری اقدامات کا مطالبہ کیا ہے۔
