معروف اینکر اور اداکار توثیق حیدر کا کہنا ہے کہ پاکستان کے دو بڑے شہروں لاہور اور کراچی کا موازنہ اکثر کیا جاتا ہے تاہم ایک چیز ہے جس میں آپ کراچی کو نہیں ہرا سکتے۔ وہ ہے کراچی اور اس کا فیسٹول۔
اداکار کا کہنا تھا کہ عیدالاضحیٰ سے قبل مویشی منڈیوں کے منفرد ماحول کی وجہ سے کراچی کو ایک الگ ہی مقام حاصل ہے۔ کراچی میں لگنے والی مویشی منڈی کو نہ صرف پاکستان بلکہ پورے ایشیا کی سب سے بڑی منڈی قرار دیا جاتا ہے جہاں خریداری کے ساتھ ساتھ عوام تفریح کے لیے بھی بڑی تعداد میں منڈیوں رخ کرتے ہیں۔
View this post on Instagram
ان کا کہنا تھا کہ اگر کسی نے جانور نہیں بھی خریدنا تو بھی وہ منڈی جاتے ہیں اور شہر کی گلیاں اور سڑکیں رات گئے تک روشن رہتی ہیں جبکہ شہری دوستوں اور اہلِ خانہ کے ہمراہ کھانے پینے اور گپ شپ سے لطف اندوز ہوتے دکھائی دیتے ہیں۔
انہوں نے مزید کہا کہ عیدالاضحیٰ سے قبل کراچی کی رونقیں اس وقت مزید دلچسپ ہوجاتی ہیں جب مویشی اچانک بھاگ نکلتے ہیں اور شہری انہیں پکڑنے کے لیے دوڑتے نظر آتے ہیں جس سے ماحول میں خوشگوار ہلچل پیدا ہوجاتی ہے۔
توثیق حیدر کا کہنا ہے کہ کراچی بے شمار مسائل اور چیلنجز کے باوجود زندگی سے بھرپور شہر ہے جہاں کے لوگ ہر مشکل کے باوجود خوش رہنے اور تہواروں کو بھرپور انداز میں منانے کا ہنر جانتے ہیں۔
