پرائم منسٹر آفس میڈیا ونگ کے مطابق وزیرِ اعظم شہباز شریف آج بیجنگ میں مصروف دن گزاریں گے، جہاں وہ چین کی اعلیٰ قیادت سے اہم ملاقاتیں کریں گے۔
وزیراعظم کی آج عوامی جمہوریہ چین کے صدر، وزیراعظم اور دیگر اعلیٰ چینی حکام سے ملاقاتیں طے ہیں۔
مزید پڑھیں: چین میں لیبر مہنگی ہوچکی، چینی کمپنیاں صنعتیں پاکستان منتقل کریں، وزیراعظم شہباز شریف کی پیشکش
وزیراعظم کو گریٹ ہال آف پیپل آمد پر گارڈ آف آنر پیش کیا جائے گا جبکہ چینی وزیراعظم ان کا استقبال کریں گے۔ بعد ازاں دونوں ممالک کے وفود کی سطح پر مذاکرات ہوں گے۔
دونوں وزرائے اعظم پاکستان اور چین کے درمیان مختلف مفاہمتی یادداشتوں اور معاہدوں کے تبادلے کی تقریب میں بھی شرکت کریں گے۔
وزیراعظم اپنے وفد کے ہمراہ Tiananmen Square میں عوامی ہیروز کی یادگار پر حاضری دیں گے اور پھولوں کی چادر چڑھائیں گے۔
مزید پڑھیں:وزیراعظم شہباز شریف کا دورہ چین، 2 اہم مفاہمتی یادداشتوں پر دستخط کرلیے گئے
دورے کے دوران وزیراعظم معروف چینی سرمایہ کاروں اور مختلف چینی کمپنیوں کے سی ای اوز سے بھی ملاقات کریں گے تاکہ دوطرفہ اقتصادی تعاون اور سرمایہ کاری کے فروغ پر تبادلہ خیال کیا جا سکے۔
وزیراعظم اعلیٰ چینی قیادت کے ہمراہ پاک۔چین سفارتی تعلقات کی 75ویں سالگرہ کے حوالے سے منعقدہ خصوصی تقریب میں بھی شرکت کریں گے۔
