فیلڈ مارشل عاصم منیر نے عیدالاضحیٰ کے موقع پر بلوچستان کے ضلع ژوب کا دورہ کیا، جہاں انہوں نے مغربی سرحدوں پر تعینات فرنٹ لائن فوجی جوانوں کے ساتھ عید منائی اور ان کے بلند حوصلے، پیشہ ورانہ تیاری اور دہشتگردی کے خلاف عزم کو سراہا۔
مزید پڑھیں: فیلڈ مارشل عاصم منیر نے امریکا اور ایرانی قیادت کے ساتھ رابطوں میں اہم کردار ادا کیا، وزیراعظم شہباز شریف
پاک فوج کے شعبہ تعلقات عامہ (آئی ایس پی آر) کے مطابق دورے کا آغاز نمازِ عید سے ہوا، جس کے دوران پاکستان کے دیرپا امن، استحکام اور خوشحالی کے لیے خصوصی دعائیں کی گئیں، جبکہ وطن عزیز کے دفاع میں اپنی جانوں کا نذرانہ پیش کرنے والے شہدا کے ایصالِ ثواب کے لیے بھی دعا کی گئی۔
فیلڈ مارشل عاصم منیر نے افسران اور جوانوں کو عید کی مبارکباد پیش کرتے ہوئے کہا کہ دشمن عناصر کی سرپرستی میں ہونے والی دہشتگردی کے باوجود پاک فوج کے جوان غیر معمولی جرات، ثابت قدمی اور مکمل چوکسی کے ساتھ اپنی ذمہ داریاں انجام دے رہے ہیں۔
انہوں نے ملک کو دہشتگردی اور بیرونی خطرات سے محفوظ رکھنے کے لیے جوانوں کی قربانیوں اور بہادری کو زبردست خراجِ تحسین پیش کیا۔
انہوں نے کوئٹہ میں حالیہ دہشتگرد حملے کا حوالہ دیتے ہوئے کہا کہ بھارت کی سرپرستی میں سرگرم ’فتنہ الہندوستان‘ اور اس کے سہولتکاروں کی جانب سے کیے جانے والے بزدلانہ حملے پاکستان یا اس کی مسلح افواج کے عزم کو متزلزل نہیں کر سکتے۔
انہوں نے واضح کیا کہ پاک فوج، قانون نافذ کرنے والے ادارے اور بلوچستان کے عوام دہشتگردی کے مکمل خاتمے کے لیے متحد ہیں اور دہشتگردوں، ان کے سہولتکاروں اور معاونین کے خلاف بلاامتیاز کارروائیاں جاری رکھی جائیں گی۔
فیلڈ مارشل نے اس بات کا اعادہ کیا کہ پاکستان کی مسلح افواج ہر قسم کے داخلی و خارجی خطرات سے نمٹنے کے لیے مکمل طور پر تیار ہیں اور قوم کے تحفظ کے لیے کسی قربانی سے دریغ نہیں کیا جائے گا۔
مزید پڑھیں: فیلڈ مارشل سید عاصم منیر سرکاری دورے پر ایران پہنچ گئے، اہم شخصیات سے ملاقاتیں متوقع
ژوب آمد پر کمانڈر کوئٹہ کور نے فیلڈ مارشل کا استقبال کیا۔ اس موقع پر انہوں نے یادگارِ شہدا پر پھولوں کی چادر بھی چڑھائی اور وطن کے دفاع میں جامِ شہادت نوش کرنے والے بہادر سپوتوں کو خراجِ عقیدت پیش کیا۔
