محکمہ موسمیات نے ملک کے مختلف علاقوں میں موسم کی صورتحال سے متعلق تازہ پیشگوئی جاری کرتے ہوئے کہا ہے کہ سندھ اور جنوبی بلوچستان کے بیشتر اضلاع میں آج شدید گرمی کا امکان ہے، جبکہ درجہ حرارت معمول سے زیادہ رہنے کی توقع ہے۔
یہ بھی پڑھیں:لاہور میں طوفانی بارش اور ژالہ باری، 100 سے زائد فیڈر ٹرپ، معمولات زندگی معطل
محکمہ موسمیات کے مطابق دوپہر کے بعد کشمیر، خطۂ پوٹھوہار اور شمال مشرقی بلوچستان میں مطلع جزوی طور پر ابر آلود رہنے کا امکان ہے۔ اس کے علاوہ پنجاب کے چند مقامات پر آندھی اور گرج چمک کے ساتھ بارش بھی متوقع ہے، جس سے مختلف علاقوں میں موسم قدرے بہتر ہو سکتا ہے۔
میڈیا رپورٹ کے مطابق گزشتہ روز ملک کے مختلف شہروں میں شدید گرمی ریکارڈ کی گئی، جہاں سب سے زیادہ درجہ حرارت سبی اور تربت میں 49 ڈگری سینٹی گریڈ ریکارڈ کیا گیا۔
محکمہ موسمیات کے مطابق شہید بینظیر آباد اور نوکنڈی میں درجہ حرارت 47 ڈگری، سکھر میں 43، حیدرآباد، ڈیرہ غازی خان اور ڈیرہ اسماعیل خان میں 41 ڈگری ریکارڈ کیا گیا۔
اسی طرح ملتان میں 39، پشاور اور مظفرآباد میں 38، کراچی میں 37، کوئٹہ میں 36، گلگت میں 35، اسلام آباد میں 33 جبکہ لاہور میں زیادہ سے زیادہ درجہ حرارت 30 ڈگری سینٹی گریڈ ریکارڈ کیا گیا۔
