اٹلی کی پولیس نے جنوبی اٹلی میں ایک جل کر تباہ ہونے والی منی وین سے 4 پاکستانی نژاد زرعی مزدوروں کی لاشیں ملنے کے واقعے میں 2 پاکستانی شہریوں کو گرفتار کر لیا ہے۔
اطالوی میڈیا کے مطابق یہ جلی ہوئی منی وین جنوبی اٹلی کے علاقے کالابریا کے ایک وسیع زرعی خطے میں واقع گاؤں امینڈولارا کے قریب ایک پیٹرول اسٹیشن سے برآمد ہوئی تھی۔
یہ بھی پڑھیں: پاکستان کے ماہر افرادی قوت کے لیے اٹلی 10,500 ورک ویزے جاری کرے گا
رپورٹ میں قانون نافذ کرنے والے اداروں کے حوالے سے بتایا گیا ہے کہ پیٹرول اسٹیشن کی سی سی ٹی وی فوٹیج میں 2افراد کو وین کے دروازے باہر سے بند کرتے اور اس کے اندر آتش گیر
مائع پھینکتے ہوئے دیکھا گیا۔
فوٹیج کے مطابق اس کے فوراً بعد گاڑی میں آگ بھڑک اٹھی جبکہ دونوں افراد موقع سے فرار ہوگئے۔
Amendolara, 4 braccianti pakistani, impiegati nella raccolta dei pomodori, trovati carbonizzati in un minivan
Arrestati due connazionali: i quattro pakistani sono stati bloccati all’interno del veicolo, il quale poi è stato cosparso di carburante e incendiato. pic.twitter.com/f6IpqBdnQA
— Francesca Totolo (@fratotolo2) June 2, 2026
فائر فائٹرز نے آگ بجھانے کے بعد گاڑی کے اندر سے 4 افراد کی لاشیں برآمد کیں۔
مقامی پولیس چیف انتونیو بوریلی کے مطابق، یہ بلاشبہ قتل کا واقعہ ہے، اب صرف اس کی تمام تفصیلات اور محرکات کا تعین کرنا باقی ہے۔
اخبار کے مطابق گزشتہ چند ماہ کے دوران اسی علاقے میں پاکستانی شہریوں کو لے جانے والی گاڑیوں اور منی وینز کو نذرِ آتش کرنے کے 14 واقعات پیش آ چکے ہیں۔
مزید پڑھیں: پاکستان کے دیہاتی بہن بھائی نے اٹلی کی معروف یونیورسٹی کی اسکالرشپ کیسے حاصل کی؟
رپورٹ میں بتایا گیا ہے کہ زرعی مزدوری، رہائشی دستاویزات اور رہائش کے معاملات پر تارکینِ وطن کے مختلف گروہوں کے درمیان کشیدگی پائی جاتی ہے، جسے ان واقعات کی ایک ممکنہ وجہ قرار دیا جا رہا ہے۔
پولیس نے گرفتار ملزمان سے تفتیش شروع کر دی ہے جبکہ واقعے کے مزید پہلوؤں کی تحقیقات جاری ہیں۔
