نیشنل الیکٹرک پاور ریگولیٹری اتھارٹی (نیپرا) نے بجلی کے بنیادی ٹیرف میں 1.98 روپے فی یونٹ کمی کی منظوری دے دی ہے۔
تاہم فیول چارج ایڈجسٹمنٹ (ایف سی اے) کی مد میں 1.19 روپے فی یونٹ اضافے کے باعث جون کے بجلی بلوں میں صارفین کو مجموعی طور پر 80 پیسے فی یونٹ ریلیف ملے گا۔
یہ بھی پڑھیں: نیپرا نے ریگولیٹری فیسوں کی ادائیگی کے لیے ڈیجیٹل نظام متعارف کرا دیا
نیپرا کے فیصلے کے مطابق 2026 کی پہلی سہ ماہی ایڈجسٹمنٹ کے تحت بجلی نرخوں میں 1.98 روپے فی یونٹ کمی کی گئی ہے، جس سے ملک بھر کے صارفین کو 67 ارب روپے سے زائد کا ریلیف ملنے کا تخمینہ ہے۔
یہ کمی مسلسل 3 ماہ، یعنی جون، جولائی اور اگست کے بلوں پر لاگو رہے گی۔
NEPRA approves Rs67.17 billion power tariff relief for three months https://t.co/bxJRRqayNX
— Ahmad Ahmadani (@AhmadAhmadani77) June 5, 2026
نیپرا نے واضح کیا ہے کہ یہ رعایت ملک بھر کے تمام صارفین، بشمول کے الیکٹرک صارفین، کو حاصل ہوگی، تاہم لائف لائن صارفین کو اس نظرثانی شدہ ٹیرف میں شامل نہیں کیا گیا۔
دوسری جانب نیپرا نے اپریل 2026 کے فیول پرائس ایڈجسٹمنٹ کے تحت ملک بھر میں بجلی کی قیمت میں 1.19 روپے فی یونٹ اضافے کی بھی منظوری دی ہے۔
مزید پڑھیں: 25 کلوواٹ تک سولر صارفین کے لیے لائسنس فیس ختم، نیپرا کا نوٹیفکیشن جاری
یہ اضافہ کراچی سمیت تمام صارفین پر لاگو ہوگا اور اس کا اطلاق جون کے جاری بلوں میں کیا جائے گا۔
نیپرا کی جانب سے جاری نوٹیفکیشن کے مطابق سینٹرل پاور پرچیزنگ ایجنسی نے اپریل کے فیول ایڈجسٹمنٹ کی مد میں 1.73 روپے فی یونٹ اضافے کی درخواست کی تھی۔
تاہم جمع کرائے گئے اعداد و شمار اور حسابات کا جائزہ لینے کے بعد ریگولیٹر نے 1.19 روپے فی یونٹ اضافے کی منظوری دی۔
